თუ უკვე გაეცანით ჩემი აკვარიუმის პირველ ნაწილს, მაშინ თამამად შეგიძლიათ განაგრძოთ კითხვა და კიდევ უფრო მეტი გაიგოთ აკვარიუმის ბინადრების შესახებ.

აკვარიუმში ლაღად მოცურავე ლამაზი თევზებისა და მოლივლივე წყალმცენარეების ყურება ყველასათვის სასიამოვნო პროცესია, რადგან ეს განტვირთვისა და რელაქსაციის ერთ-ერთი საუკეთესო საშუალებაა, თუმცა მათი მოვლისას დაშვებულმა პატარა შეცდომებმა შეიძლება ხასიათი გაგიფუჭოთ. თევზებიც ისევე საჭიროებენ მოვლა-პატრონობას, როგორც ნებისმიერი სხვა შინაური ცხოველი, მათი ჯანმრთელობა თუ სიცოცხლის ხანგრძლივობა კი მთლიანად პატრონზეა დამოკიდებული.

ხშირად პრობლემებს გავრცელებული მითების გადაუმოწმებლად დაჯერება ქმნის. ასე რომ, ამ სტატიაში შევეცდებით სიმართლე დავადგინოთ თევზების მოვლის შესახებ.

ოქროს თევზი ყველაზე მარტივი მოსავლელია

ოქროს თევზი სულაც არაა ყველაზე უპრეტენზიო ბინადარი. მეტიც, ერთი ინდივიდისათვის აკვარიუმში მინიმუმ 30, ხოლო საუკეთესო შემთხვევაში 50 ლიტრი წყალია საჭირო. წყალი მუდმივად სუფთა უნდა იყოს, რადგან ოქროს თევზი ხშირად საკუთარი გამონაყოფითვე იწამლება და კვდება. აუცილებელია კარგი ფილტრი და აკვარიუმის ხშირად წმენდა. აღსანიშნავია, რომ ეს თევზი ვერც მრგვალ და პატარა აკვარიუმში იგრძნობს თავს ბედნიერად, როგორც პოპ-კულტურიდან გამომდინარე გვგონია.

პატარა აკვარიუმი უფრო მოსახერხებელია

ეს მოსაზრება მტკნარი სიცრუეა. პატარა აკვარიუმი ნიშნავს არასაკმარის წყალსა და მცირე ადგილს თევზებისთვის. ამ მდგომარეობაში თევზი წყვეტს ნორმალურ ზრდასა და განვითარებას, ტემპერატურის დარეგულირება კი ძალიან რთულია. ასევე თითქმის შეუძლებელია სასიცოცხლოდ საჭირო ინვენტარის მოთავსება, როგორიც არის ფილტრი, ჟანგბადის სისტემა და ა.შ.

ვაჭმევ იმდენს, რამდენიც გაუხარდება

თევზების ყურებით მიღებული სიამოვნება ბევრისათვის არასაკმარისია, მათი მოფერებაც შეუძლებელია, ასე რომ, კონტაქტის ერთადერთ გზად აკვარიუმის ბინადრების გამოკვებაღა რჩება. წყლის ზედაპირზე ამოსული თევზები, რომლებიც სულმოუთქმელად ელოდებიან, როდის ვაჭმევთ, სახალისო დასაკვირვებელია, თუმცა უნდა ვიცოდეთ, რომ გადაჭარბებული კვება შეიძლება მათთვის საზიანო იყოს. თევზს რაც უფრო მეტ საკვებს მისცემ, მით უფრო მეტს შეჭამს, მაგრამ სამწუხაროდ ამდენი ჭამისაგან მისი სუსტი კუჭ-ნაწლავი მოიშლება. რეკომენდებულია დღეში ერთხელ, დღის საათებში გამოკვება, კვირაში ერთხელ კი შიმშილის დღე უნდა მოვუწყოთ. ამით მათი ორგანიზმი გაიწმინდება და გაჯანსაღდება.