კომპანიებისთვის, რომლებიც კორონავირუსთან ბრძოლაში აქტიურად ჩაერთნენ, კლიპარტი ახალ კამპანიას იწყებს. #ბიზნესიზრუნავს — ასეთია კამპანიის სახელწოდება, რომლის ფარგლებშიც კლიპარტი უსასყიდლოდ გაავრცელებს ინფორმაციას COVID19-ის წინააღმდეგ პასუხისმგებლიანი ბიზნესკომპანიების აქტივობების შესახებ — იქნება ეს ფულადი შემოწირულობა თუ მოქალაქეებისათვის გაწეული სხვა სახის დახმარება ვირუსთან ბრძოლის ფარგლებში.

ამ ინფორმაციას კლიპარტი stopcov.gov.ge-ზე გამოქვეყნებული ოფიციალური მონაცემებიდან მიიღებს, რის შემდეგაც ინფორმაციას აქტივობების შესახებ 10-მდე პოპულარულ საინფორმაციო საგენტოს ვებგვერდზე განათავსებენ. ახალი ამბები გაზიარდება სოციალური მედიის გვერდზეც. ამით კომპანიების პასუხისმგებლიანი ქმედებების შესახებ ინფორმაციას მიიღებს პრაქტიკულად საქართველოს ყველა მოქალაქე. გარდა ამისა, კლიპარტის საბანერო ზონების დიდი ნაწილი პოპულარულ საინფორმაციო საიტებზე ასევე დაეთმობა კამპანიას #ბიზნესიზრუნავს.

კამპანიაში ჩართვა შეუძლიათ მცირე და საშუალო ბიზნესის წარმომადგნლებსაც, რადგან ამ ვითარებაში დასაფასებელია ნებისმიერი მასშტაბის დახმარება, რომელსაც ვირუსის წინააღმდეგ ბრძოლაში ბიზნესი გაიღებს. პასუხისმგებლობა არ იზომება გაცემული თანხის რაოდენობით.

გარდა ამისა, კომპანიებს თავად შეუძლიათ დაუკავშირდნენ კლიპარტს ტელეფონის ნომერზე: 598 67 77 79, ან გაგზავნონ ინფორმაცია ელექტრონული ფოსტით, მისამართზე: info@clp.ge