კოალიცია დამოუკიდებელი და გამჭვირვალე მართლმსაჯულებისთვის აცხადებს, რომ დაინტერესებულ პირებსა და სასამართლო მონიტორებს დისტანციურად მიმდინარე სასამართლო პროცესებში ჩართვის საშუალება უნდა ჰქონდეთ, მათი განმარტებით, სასამართლო სხდომის საჯაროობა მნიშვნელოვანია, როგორც ინდივიდის უფლებების სრულყოფილად რეალიზებისთვის, ისე მთლიანად საზოგადოებისთვის.

"სასამართლო პროცესის საჯარო ხასიათი მხარეებს იცავს საზოგადოების მეთვალყურეობის გარეშე, მართლმსაჯულების დახურულ რეჟიმში განხორციელებისგან", — აცხადებს კოალიცია.

NGO-ები განმარტავენ, რომ პრეზიდენტის დეკრეტი საგანგებო მდგომარეობაზე და იუსტიციის საბჭოს მიერ მიღებული რეკომენდაციები გულისხმობს ვიზიტორების შეზღუდვას და არა სხდომების დახურვას, რასაც მათი თქმით, თბილისის საქალაქო სასამართლოს ზოგიერთი მოსამართლე აკეთებს.

"სასამართლოს მხრიდან ადგილი აქვს არაერთგვაროვან მიდგომას, როდესაც ზოგიერთი სისხლის სამართლის განმხილველი მოსამართლე სასამართლო სხდომაზე დასწრების უფლებას აძლევს დამკვირვებელი ორგანიზაციების მონიტორებს, ხოლო მოსამართლეთა უმრავლესობა, რეგულაციებზე არასწორი აპელირებით, მათ უკრძალავს, დააკვირდეს სხდომის მიმდინარეობას, რაც ცალსახად გულისხმობს არსებული რეგულაციების უგულვებელყოფას და მანკიერი პრაქტიკის ჩამოყალიბებას", — აცხადებენ ისინი.

მათივე თქმით, სხდომათა საჯაროობის პრინციპის უგულვებელყოფა მხარეთა უფლებების უხეში დარღვევაა და ამ შეზღუდვებით არსებითად ილახება იმ პირთა საჯარო ინფორმაციის ხელმისაწვდომობის უფლებაც, როლებიც დაინტერესებული არიან საქმის განხილვაზე დასწრებით. ამიტომ კოალიცია მოუწოდებს საქართველოს იუსტიციის უმაღლეს საბჭოს და საერთო სასამართლოს თავმჯდომარეებს:

• სასამართლოებში საქმეთა განხილვის პროცესში გამოვლენილ ხარვეზებზე მოახდინონ მყისიერი რეაგირება, რათა არ დაირღვეს სამართლიანი სასამართლოს უფლების ერთ-ერთი უმნიშვნელოვანესი ელემენტი — საჯაროობის პრინციპი და სრულად არ შეიზღუდოს პროცესების საჯაროობის უზრუნველყოფა;
• პრეზიდენტის დეკრეტით გათვალისწინებული სასამართლო პროცესების დისტანციური წარმართვისას მხარეთა მონაწილეობის გარდა, უზრუნველყონ პროცესით დაინტერესებული საზოგადოების (მათ შორის - მონიტორების) შეუფერხებელი დისტანციური წვდომა პროცესებზე.

სასამართლოები, პროკურატურა, ადვოკატები და მართლმსაჯულებაში ჩართული სხვა მხარეები მუშაობის"მაქსიმალურად დისტანციურ რეჟიმზე" გადავიდნენ.