მიუხედავად იმისა, რომ ცხელება, ხველა, საერთო სისუსტე და ყელის ტკივილი ახალი CORONA-19 ინფექციის მთავარი კლინიკური ნიშნებია, ეს არ ნიშნავს, რომ უკლებლივ ყველა პაციენტი, აღნიშნული სიმპტომებით CORONA-19-ის გამომწვევი SARS-CoV-2 ვირუსით არის ინფიცირებული. ამასთან დაკავშირებით სხვადასხვა რეკომენდაციებს თოდუას კლინიკის გასტროენტეროლოგი თენგიზ თელია ავრცელებს.

რესპირატორული ინფექციების უდიდესი ნაწილი სწორედ ასე მიმდინარეობს. შემთხვევათა 5-50%-ში ამ ძირითადი სიმპტომების გამოვლენას შეიძლება წინ უსწრებდეს, ან თან ახლდეს მუცლის ტკივილი, დიარეა და/ან გულისრევა. საყურადღებოა ისიც, რომ ვირუსი აღმოჩენილია კუჭ-ნაწლავის ტრაქტიდან გამონაყოფ მასებში და დიდი ალბათობით, ის ფეკალურ-ორალური გზითაც გადაეცემა. აქედან გამომდინარე, ჰიგიენური წესების დაცვასა და პირველ რიგში, ხელების ხშირ დაბანას გადამწყვეტი მნიშვნელობა აქვს დაავადების გავრცელების პრევენციაში.

"მაქსიმალურად თავი აარიდეთ, დროებითი კოსმეტიკური ეფექტის მქონე დილეტანტურ კვებით შეზღუდვებს. იკვებეთ დაბალანსებული, ვიტამინებით მდიდარი საკვებით. ზედმეტი წონა ნამდვილად არ არის კარგი ადამიანის ჯანმრთელობისთვის, მაგრამ მისი კორექცია უნდა მოხდეს გონივრულად, ცხოვრების წესის შეცვლის გზით, და არა სპონტანურად, განსაკუთრებით დღევანდელი პანდემიის პირობებში, როცა ვირუსთან საბრძოლველად ჯანმრთელი, რაციონალური კვება ჩვენი მოკავშირეა", — ამბობს თენგიზ თელია.

კუჭ-ნაწლავის ტრაქტის დაავადებები მეტწილად ქრონიკული ხასიათისაა და პაციენტებს ხანგრძლივად უხდებათ ექიმის დანიშნული მედიკამენტების მიღება. SARS-CoV-2-ის პანდემიის დროს, ექიმის რჩევის გარეშე, სამკურნალო სქემებში ცვლილებების შეტანა დაუშვებელია. ამით ჩვენ ვავნებთ ძირითად კუჭ-ნაწლავის პრობლემას და გლობალური პანდემიის პირობებში, ეს უფრო მეტი ზიანის მომტანი შეიძლება იყოს.

SARS-CoV-2-ის პანდემიის პირობებში, პაციენტები ნაწლავის არასპეციფიკური ანთებებით (წყლულოვანი კოლიტი, კრონის დაავადება), რომლებიც იღებენ იმუნიტეტის დამაქვეითებელ მკურნალობას (პრედნიზოლონი, აზატიოპრიმი, ბიოლოგიური პრეპარატები) და/ან ანთების საწინააღმდეგო მედიკამენტებს (სულფსალაზინი, პენტაზა, სალოფალკი), მკურნალობას აგრძელებენ იგივე დოზებით და იგივე რეჟიმით, რაც მათ მანამდეც ჰქონდათ ექიმისგან დანიშნული.

SARS-CoV-2-ის პანდემიის პირობებში, პაციენტები, რომლებიც მჟავასუპრესიული მკურნალობის ქვეშ იმყოფებიან (იგულისხმება "პრაზოლების" ან ანტაციდების მიღება), აგრძელებენ ამ რეჟიმით მკურნალობას. უშუალოდ

SARS-CoV-2-ის ვირუსით ინფიცირების შემთხვევაში კი მედიკამენტის დოზირება ინდივიდუალურად განიხილება.

AGA-ს (ამერიკის გასტროენტეროლოგთა ასოციაციის 10.04.2020) რეკომენდაციით SARS-CoV-2-ით ინფიცირებულმა პაციენტებმა, სიმპტომური ინფექციის განმავლობაში, უნდა შეწყვიტონ ბიოლოგიური პრეპარატებისა და თიოპურინების მიღება (აზატიოპრიმი, მეტოტრექსატი) და ინფექციის დამთავრების შემდეგ განაახლონ მედიკამენტების მიღება. აღნიშნული არ ეხება ანთების საწინააღმდეგო მედიკამენტებს (სულფსალაზინი, პენტაზა, სალოფალკი).

რაც შეეხება გეგმურ ენდოსკოპიურ მანიპულაციებს, SARS-CoV-2-ის პანდემიის პირობებში, ისინი უნდა ჩატარდეს პრიორიტეტებისა და ურგენტულობის (გადაუდებლობის) ხარისხის შეფასების მიხედვით, შესაბამისი აღჭურვილობით, რათა მაქსიმალურად იქნას აცილებული ვირუსის გავრცელება.

სოციალური დისტანცირება, მაქსიმალური გონივრული იზოლირება და გადაადგილების შეზღუდვა, სანიტარიულ-ჰიგიენური ნორმების დაცვასთან ერთად, საშუალებას მოგვცემს, SARS-CoV-2-ის პანდემიის პირობებში, ეფექტიანად შევებრძოლოთ ვირუსის გავრცელებას.