პანდემიამ ადამიანების ყოველდღიურობა შეცვალა. ოფისებმა სახლებში გადაინაცვლეს, სამსახურების ნაწილმა სრულიად შეწყვიტა ფუნქციონირება, შეჩერდა სხვადასხვა ბიზნესის საქმიანობაც. თუმცა, არსებობს განსაკუთრებული მნიშვნელობის კომპანიები, რომლებიც ადამიანების უსაფრთხოებისა და საყოფაცხოვრებო საქმის შეუფერხებლად წარმართვისთვის 24 საათიან რეჟიმში მუშაობენ. პანდემიის პირობებში ასეთ კომპანიებს დამატებითი პასუხისმგებლობა გაუჩნდათ — იმუშაონ იმისთვის, რომ ჩვენ სახლში დავრჩეთ.

სტრატეგიული მნიშვნელობის კომპანიებს შორისაა ჯორჯიან უოთერ ენდ ფაუერი, რომელიც თბილისის მოსახლეობას სტაბილური წყალმომარაგებითა და მაღალი ხარისხის სასმელი წყლით უზრუნველყოფს.

კომპანია 500 000-ზე მეტ აბონენტს უწევს მომსახურებას 24-საათიან რეჟიმში. ჯივიპის ტექნიკური დირექტორი ზურაბ ალფაიძე გვიყვება, რომ პროცესში ყოველდღიურად 3000-ზე მეტი თანამშრომელია ჩართული. პანდემიამ ჯივიპი, ისევე, როგორც სხვა კომპანიები, სხვადასხვა გამოწვევის წინაშე დააყენა. მოსახლეობის სასმელი წყლით სტაბილური უზრუნველყოფის მიზნით, სამუშაო პროცესების შეუფერხებლად გასაგრძელებლად, კომპანიაში რამდენიმე ცვლილება განხორციელდა.

"დაავადების გავრცელების პირველივე დღეებიდან, უსაფრთხოების მიზნით, კომპანიის თანამშრომლები, რომლებიც შეძლებდნენ სახლიდან მუშაობას, მათ შორის ცხელი ხაზის, სერვის ცენტრების და მომხმარებლებთან ურთიერთობის სამსახურის თანამშრომლები, სრულად გადავიდნენ დისტანციურ რეჟიმზე. მომხმარებლებისთვის მომსახურების მიღება შესაძლებელი გახდა დისტანციურად, სერვის ცენტრში მისვლის გარეშე, მათთვის სასურველი განაცხადის ელეტრონულ მეილზე - online@gwp.ge-ზე გაგზავნით", –– ამბობს ზურაბ ალფაიძე.

კომპანიის ის თანამშრომლები, რომლებიც პროფესიული სპეციფიკიდან გამომდინარე დისტანციურ რეჟიმში საქმიანობის გაგრძელებას ვერ ახერხებდნენ, უსაფრთხოების ნორმების დაცვითა და დაავადებათა კონტროლის ეროვნული ცენტრის რეკომენდაციების სრული გათვალისწინებით მუშაობდნენ და აგრძელებენ მუშაობას ტექნიკური, თუ სხვა საკითხების მოსაგვარებლად.

ჯორჯიან უოთერ ენდ ფაუერის საინვესტიციო გეგმა, ყოველწლიურად დედაქალაქის სტაბილური წყალმომარაგებისთვის სხვადასხვა ქუჩაზე სარეაბილიტაციო სამუშაოების ჩატარებას მოიცავს.

"შექმნილი ვითარების და მასთან დაკავშირებული შეზღუდვების მიუხედავად, 30-ზე მეტ სარეაბილიტაციო პროექტზე ვიმუშავეთ და თითოეული გეგმის მიხედვით დავასრულეთ. შეიცვალა 16 კმ სიგრძის წყალმომარგების ქსელი და ჯამურმა ინვესტიციამ 20 მლნ ლარი შეადგინა.

10 მაისს დავასრულეთ ჩვენი მხრიდან ჭავჭავაძის გამზირის რეაბილიტაცია, რომლის ფარგლებშიც სრულად განვაახლეთ 10 კმ სიგრძის წყალსადენის და წყალარინების სისტემა. ახალ ქსელზე თანამედროვე ჩამკეტ-მარეგულირებელი ურდულები, ჰიდრანტები და საკვანძო ჭები დამონტაჟდა. ეს პროექტი ჩვენთვის ერთ-ერთი ყველაზე მნიშვნელოვანია და მასში ჯამში 10 მლნ ლარის ინვესტიცია განხორციელდა", — აღნიშნავს ზურაბ ალფაიძე.

სარეაბილიტაციო პროექტები დასრულდა თბილისის სხვა რაიონებშიც. სრულად განახლდა ჯანჯღავას მეორე ჩიხის, რადიანის, ლეჟავას, ჭილაიას, ნოე ხომერიკის ქუჩების წყალმომარაგების სისტემები. უახლოეს მომავალში კი ჯივიპი კარტოზიას, ლეჩხუმის, ორთაჭალის, ჭოველიძის და ნავთლუღის ქუჩების სარეაბილიტაციო სამუშაოებს გეგმავს.

პანდემიის მიუხედავად, ჯორჯიან უოთერ ენდ ფაუერი 24-საათიან რეჟიმში განაგრძობს მუშაობას, უწყვეტად უზრუნველყოფს დედაქალაქის მოსახლეობას მაღალი ხარისხის სასმელი წყლით და ცდილობს მომხმარებლების გადაუდებელი საჭიროებები სწრაფად, დისტანციურ რეჟიმში მოაგვაროს.