მმართველი გუნდის დეპუტატი, ირაკლი კობახიძე "უზრდელობად" აფასებს ევროპული საქართველოს დეპუტატის, გიგა ბოკერიას განცხადებას იმის შესახებ, რომ გერმანიის ელჩი "შარში გაეხვა" და მას თანაუგრძნობს. კობახიძე ბოკერიას ისევ ნაციონალურ მოძრაობასთან აიგივებს და ამბობს, რომ ასე წარმოჩნდება, რომ ეს პარტია "ანტიდასავლურია".

"გერმანიის ელჩის განცხადებასთან დაკავშირებით, მათი შეურაცხმყოფელი და უზრდელური კომენტარები არის კიდევ ერთი დასტური იმისა, რომ ნაციონალური მოძრაობა უკვე ფორმალურადაც ყალიბდება, როგორც ანტიდასავლური პოლიტიკური ძალა. ეს არის შეუქცევადი პროცესი, საზოგადოება ამას ხედავს", — განაცხადა კობახიძემ.

გარდა ამისა, კობახიძე ამბობს, რომ გერმანიის ელჩის განცხადებამ "ნათელი მოფინა", თუ რა იყო მოლაპარაკების შინაარსი და არ უკვირს, რომ ამან "გიგა ბოკერიას და ნაციონალების გაღიზიანება გამოიწვია".

გერმანიის ელჩი, ჰუბერტ ქნირში ამბობს, რომ 8 მარტის შეთანხმებაში გიორგი რურუა ნახსენები არ ყოფილა. ეს განაცხადი მან დღეს, 26 ივნისს ინტერპრესნიუსის ჟურნალისტის კითხვის პასუხად გააკეთა, სადაც ასევე ისაუბრა იმაზეც, რომ შეთანხმების იმპლემენტაციისთვის ორშაბათი, ანუ საკონსტიტუციო ცვლილებების მესამე მოსმენა გადამწყვეტი იქნება:

"მომდევნო ორშაბათი გადამწყვეტი დღეა [8 მარტის შეთანხმების] იმპლემენტაციისთვიის და იმედი მაქვს, ყველა პოლიტიკური ძალა მისცემს ხმას პარლამენტში და მხარს დაუჭერს საკონსტიტუციო ცვლილებას.

ფასილიტატორებმა მკაფიო განცხადება გაავრცელეს ერთი კვირის წინ და აბსოლუტურად ცხადი გახდა, რომ ჩვენ სრულად ვუჭერთ მხარს ამ საკონსტიტუციო ცვლილებებს.

ბატონი რურუა არ არის ნახსნები ამ შეთანხმებაში. ეს ძალიან მკაფიოა, ყველას შეუძლია ამის წაკითხვა. გაკვირვებული ვარ, იმ დისკუსიის გამო, რაც პოლიტიკურ პარტიებს შორის გაიმართა, ერთმანეთის დადანაშაულების მცდელობა, როცა ოპოზიცია მმართველ პარტიას ადანაშაულებს კანონპროექტის ჩავარდნაში და პირიქით".

ევროპული საქართველოს დეპუტატის, გიგა ბოკერიას განცხადებით, გერმანიის ელჩს, ჰურბერტ ქრინშს თანაუგრძნობს, რადგან ის ისევ "შარში გაეხვა". ასე გამოეხმაურა ის ელჩის განცხადებას იმაზე, რომ 8 მარტის შეთანხმება გიორგი რურუას საკითხს არ მოიცავს და შეთანხმების პირობა ოროვე ხელმომწერმა მხარემ უნდა შეასრულოს.

"თანავუგრძნობ. მერამდენედ უნდა გაეხვეს ეგეთ შარში, "თარგმანში დაკარგულს" გავს. მერე ბოდიშის მოხდა უწევს ხოლმე. ჩვენ პარტიას ბოდიში მოგვიხადა, შეცდომაში შეგვიყვანეს 20 ივნისზეო. ხო გახსოვთ, მთავრობამ აქ რო მოიყვანა. ზოგჯერ გამოცდილება არ ჰყოფნით დიპლომატებს, შარში ეხვევიან და ვუთანაგრძნობ მას", — განაცხადა ბოკერიამ.