პარლამენტის თავმჯდომარის არჩილ თალაკვაძის აზრით, დეპუტატების საქმიანობის შეფასება მათი გამოსვლების რაოდენობის მიხედვით, ზედაპირულია. თალაკვაძე საერთაშორისო გამჭვირვალობა — საქართველოს ანგარიშს გამოეხმაურა, რომელიც 2019 წლის საპარლამენტო საქმიანობას ეხება.

"დეპუტატების საქმიანობის შეფასება მათი გამოსვლების რაოდენობით, მე ვფიქრობ, ეს არის ყველაზე ზედაპირული შეფასება, რომელიც ოდესმე მომისმენია და მინახავს სხვა ევროპული პარლამენტების შემთხვევაში. ამიტომ მე ვთხოვდი ყველას, ვინც დაინტერესებულია პარლამენტის საქმიანობა შეაფასოს, დეპუტატების გამოსვლების რაოდენობა მექანიკურად კი არ დათვალონ, არამედ ნახონ რეალურად რას აკეთებენ ეს ადამიანები იმ საზოგადოებაში, სადაც ისინი აირჩიეს", — ამბობს პარლამენტის თავჯდომარე.

2019 წელს პარლამენტის 21 დეპუტატს სიტყვით გამოსვლის უფლებით არ უსარგებლია. ამის შესახებ საერთაშორისო გამჭვირვალობა — საქართველოს პარლამენტის საქმიანობის შეფასების ანგარიშშია საუბარი.

პარლამენტის მონიტორინგის ფარგლებში ორგანიზაციამ 2019 წლის 1 იანვრიდან 2019 წლის 31 დეკემბრამდე პერიოდში საკანონმდებლო ორგანოს საქმიანობა შეაფასა.

21 დეპუტატი, რომლებიც სიტყვით არ გამოსულან:

• ირაკლი აბუსერიძე (უმრავლესობა, მაჟორიტარი);
• ლევან ბეჟანიძე (უმრავლესობა, მაჟორიტარი);
• რუსლან გაჯიევი (უმრავლესობა, მაჟორიტარი);
• მახირ დარზიევი (უმრავლესობა);
• მუხრან ვახტანგაძე (უმრავლესობა, მაჟორიტარი);
• ზაზა კედელაშვილი (ევროპული საქართველო);
• თეიმურაზ კოხრეიძე (უმრავლესობა);
• იოსებ მაკრახიძე (უმრავლესობა, მაჟორიტარი);
• სამველ მანუკიანი (უმრავლესობა);
• ენზელ მკოიანი (უმრავლესობა, მაჟორიტარი);
• გიორგი მოსიძე (დამოუკიდებელი წევრი, მაჟორიტარი);
• რომან მუჩიაშვილი (უმრავლესობა, მაჟორიტარი);
• რამაზ ნიკოლაიშვილი (დამოუკიდებელი წევრი);
• რუსლან პოღოსიანი (უმრავლესობა);
• დიმიტრი სამხარაძე (უმრავლესობა);
• ერეკლე ტრიპოლსკი (უმრავლესობა);
• გოდერძი ჩანქსელიანი (უმრავლესობა, მაჟორიტარი);
• არჩილ ხაბაძე (უმრავლესობა);
• ირაკლი ხახუბია (უმრავლესობა, მაჟორიტარი);
• ელგუჯა გოცირიძე (უმრავლესობა, მაჟორიტარი);
• ვიქტორ ჯაფარიძე (უმრავლესობა).

ჩამოთვლილი დეპუტატებიდან ზოგიერთს ხმა წლების განმავლობაში საერთოდ არ ამოუღია. 2019 წლის ნოემბრის მონაცემებით, მოქმედი პარლამენტის 16 დეპუტატს სამი წლის განმავლობაში ხმა საერთო არ ამოუღია. მათგან რვა "პრინციპული დეპუტატია" და პროპორციული საარჩევნო სისტემის კანონპროექტი ჩააგდო.