დაავადებათა კონტროლის ეროვნული ცენტრის დირექტორის, ამირან გამყრელიძის ინფორმაციით, ამ დროისთვის, კორონავირუსის კუთხით, საყურადღებოდ რჩება ოთხი წერტილი: მესტია, ყაზბეგი, ქობულეთი და ყარაჯალარი.

მისი თქმით, მესტიაში ტესტირება 3509 ადამიანს ჩაუტარდა და გარდა ამისა, 1246 ადამიანი გამოიკვლიეს ისეთი, ვისაც იქ მოგზაურობის ისტორია ჰქონდა. ჯამში, კორონავირუსი 49 ადამიანს დაუდასტურდა, ამათგან 29 უშუალოდ მესტიაშია, მეტწილად, სოფელ ლენჯერში. რაც შეეხება დანარჩენ 20 ადამიანს, ისინი ინფიცირებულებთან კონტაქტში მყოფები არიან. ამირან გამყრელიძემ თქვა ისიც, რომ ბოლო 4 დღის განმავლობაში უშუალოდ მესტიაში ახალი შემთხვევა არ გამოვლენილა.

რაც შეეხება ყაზბეგს, NCDC-ის დირექტორის თქმით, აქ სულ 14 ახალი შემთხვევა გამოვლინდა და აქედან 4 სასაზღვრო პოლიციას უკავშირდება, სხვები კი მათთან კონტაქტში მყოფი პირები არიან. გამყრელიძის ინფორმაციით, კონტაქტები იყო სოფელ გარბანსა და სოფელ არშაში, ასევე, დაბა სტეფანწმინდაში, სადაც 5 ოჯახი თვითიზოლაციაში რჩება.

გამყრელიძე საყურადღებოდ ასახელებს ქუბულეთსაც, სადაც რამდენიმე დღის წინ კაფე ჰავანას თანამშრომელს კორონავირუსი დაუდასტურდა. მისი ინფორმაციით, ამ დროისთვის ჰავანას 5 ინფიცირებული უკავშირდება — ორი თანამშრომელი და ორი ამ თანამშრომლებთან კონტაქტში მყოფი პირი. მეხუთე ინფიცირებული კი ერთ-ერთი თანამშრომლის დედაა. გამყრელიძის თქმითვე, ქობულეთში კორონავირუსის კიდევ ერთი შემთხვევა დაფიქსირდა, თუმცა ეს კაფე ჰავანას კლასტერს არ უკავშირდება. როგორც დაავადებათა კონტროლის ეროვნული ცენტრის დირექტორი ამბობს, ჰავანა უკვე დაკეტილია და დღეს აღწერენ ქობულეთში და ბათუმში მდებარე ღამის კლუბებს, კაფეებსა და სასტუმროებს, შემდეგ კი მათი თანამშრომლების ინტენსიური ტესტირება დაიწყება.

გარდა ამისა, გამყრელიძის ინფორმაციით, განიხილება ბათუმში ორი კარვის დადგმაც, სადაც მსურველებს ნებაყოფლობით ტესტირებას შესთავაზებენ, რათა ჰქონდეთ ინფორმაცია, იქ "ვირუსი ტრიალებს თუ არა".

კიდევ ერთ საყურადღებო წერტილად ამირან გამყრელიძე გარდაბნის მუნიციპალიტეტის სოფელ ყარაჯალარს ასახელებს. მისი თქმით, იქ ტესტირება გრძელდება, თუმცა "დამყოლობა არ არის ისეთი, როგორიც გვსურს".

ამირან გამყრელიძემ კიდევ ერთხელ ხაზი გაუსვა, რომ კორონავირუსის პრევენციისთვის ძალაში რჩება დახურულ სივრცეში ნიღბის ტარების რეკომენდაცია, ასევე, დისტანციის დაცვა და ხელების ჰიგიენა.

გარდა ამისა, NCDC-ის დირექტორმა დღეს ასევე თქვა, რომ 17 აგვისტოდან მეორე სეროპრევალენტური კვლევა დაიწყეს და ამ შემთხვევაში ეს შეეხება ქობულეთს, ხელვაჩაურს, მარტვილსა და ბორჯომს. გამყრელიძე განმარტავს, რომ ეს გულისხმობს შემთხვევითობის პრინციპით 1200 ადამიანის შერჩევას, რომლებთანაც მივლენ ეპიდემიოლოგები, შეავსებენ კითხვარს და ჩაუტარებენ ტესტირებას იმუნოგლობული G-ზე. შედეგად, უნდა გამოვლინდეს, აქვთ თუ არა ამ ადამიანებს კორონავირუსი უკვე გადატანილი.