მხოლოდ ადამიანები როდი იცნობენ ერთმანეთს ინტერნეტის საშუალებით და შემდეგ პირისპირ ხვდებიან. როგორც აღმოჩნდა, ზოგიერთი ცხოველიც ასე იქცევა. ამ ორი მეგობრის შემთხვევაშიც სწორედ ასე მოხდა.

ინსტაგრამზე ცნობილ ფლორიდელ ოქროსფერ რეტრივერს, კევინს, ყველანაირ სახალისო თავგადასავალში უყვარს მონაწილეობის მიღება. ამჯერად კევინი ქლიერუოთერის საზღვაო აკვარიუმში მიიწვიეს, სადაც, როგორც იქნა, შესაძლებლობა მიეცა, თავის ვირტუალურ მეგობარს შეხვედროდა. მისი მეგობარი კი, არც მეტი, არც ნაკლები, დელფინია — სახელად უინთერი.

ეს მეგობრობა მაშინ დაიწყო, როცა კევინის ყურადღება ქლიერუოთერის საზღვაო აკვარიუმმა მიიპყრო. კევინს უყვარს თავისი იხვისთავიანი ქუდის ტარება და, როგორც აღმოჩნდა, უინთერიც გიჟდება იხვებზე.

მალევე კევინმა და მისმა ადამიანმა მეგობარმა უინთერისა და მისი მომვლელისგან, ქეითი ვოიდილასგან, ვიდეო მიიღეს, სადაც ისინი მათ ესალმებოდნენ და ვიდეოპაემანზე იწვევდნენ.

აკვარიუმმა თავის გვერდზე კევინის ვიდეო განათავსა და დასძინა: "ეს ახალი შესანიშნავი მეგობრობის დასაწყისია? იმედია, მეგობრობის საერთაშორისო დღეს ახალ მეგობრებს გავიჩენთ და ვფიქრობთ, ეს რაღაც განსაკუთრებულის დასაწყისია. კევინთან FaceTime-ით საუბარს ხომ არ ისურვებდით?"

ვიდეოპაემანზე კი კევინი პირადად მიიწვიეს ქლიერუოთერის საზღვაო აკვარიუმში, თავის მეგობართან პირისპირ შესახვედრად.

"კევინი აკვარიუმს ეწვია და უინთერის ახალი სახლი დაათვალიერა, სადაც სხვა გადარჩენილი დელფინებიც ცხოვრობენ", — ამბობს კევინის პატრონი, ელის გორნი, — "მთელი აკვარიუმი მოიარა და ახალი მეგობრებიც გაიჩინა, მათ შორის ვარხვები, კუები და ზღვის კატები. ამის შემდეგ იგი დელფინების ახალთახალი კომპლექსისკენ გაემართა, რომელიც ხუთ აუზს აერთიანებს. აქ იგი უინთერსაც შეხვდა და სხვა დელფინებსაც: ჰოუფს, ფიჯეის, ნიკოლასს და ჰემინგუეის".

კევინს უინთერის ძველ აუზში მის მომვლელთან ერთად ცურვის საშუალებაც კი მიეცა.

"კევინთან ერთად უინთერის ძველ სახლში ცურვა ალბათ ის დღეა, რომელიც არასდროს დამავიწყდება", — ამბობს ქეითი ვოიდილა, — "გარდა იმისა, რომ მასთან ერთად ცურვისას ყვინთვა არ მჭირდებოდა, რადგან ორივეს თავები წყლის ზემოთ გვქონდა, ამასთან ეს სხვა მიზეზითაც იყო გამორჩეული მომენტი, რადგან ჩემი სიყვარული ცხოველების, გარემოსა და ოკეანესადმი ერთმანეთს შეერწყა. თავშესაფარში მყოფი ყველა ცხოველი მიყვარს, თუმცა ძაღლებში რაღაც ისეთია, რაც ყოველთვის ღიმილს მგვრის".

"ჩემი აზრით, ეს კევინის ცხოვრებაში საუკეთესო დღე იყო! ძალიან მადლიერი ვართ იმ შესაძლებლობისთვის, რომელიც კევინს მიეცა", — აღნიშნავს ელისი, — "ამ თავგადავალში მისი საყვარელი ნაწილი, რასაკვირველია, უინთერთან შეხვედრა და მის ძველ სახლში მომვლელებთან ერთად ცურვა იყო".

კევინის ვოიაჟის ფოტოები შეგიძლიათ, ქვემოთ იხილოთ: