ალექსანდრ ლუკაშენკომ ყველა იმ დაწესებულების დახურვა ბრძანა, რომლის თანამშრომლებიც გაფიცულები არიან.

"ხალხი დამშვიდდება და შემდეგ გავერკვევით, ვინ მოვიწვიოთ ამ დაწესებულებებში უკან", — განაცხადა ლუკაშენკომ.

ბელარუსში ათეულობით დაწესებულების თანამშრომელი გაიფიცა და პროტესტის მონაწილეებს შეუერთდა. მიუხედავად იმისა, რომ მილიციამ წინასწარ გადაკეტა შესასვლელები და დასაქმებულების ნაწილი დააკავა კიდეც, გაფიცვას ხელი ვერ შეუშალა.

სიტყვით გამოსვლისას ლუკაშენკო ამტკიცებდა, რომ ფოტოების უმეტესობა, სადაც ნაცემი ხალხის ჩანს, დადგმულია და სიმართლეს არ შეესაბამება. ამავდროულად, ის გამოესარჩა მილიციას და კიდევ ერთხელ განაცხადა, რომ ისინი თავის საქმეს აკეთებენ. მეტიც, ლუკაშენკომ მოუწოდა ხალხს, რომ აპატიონ მილიციას, რადგან ისინიც მათი ხალხი არიან.

• მე და პუტინი ერთ აზრზე ვართ, ბელარუსში გვწამლავენ, რომ შემდეგ რუსეთს ეცნენ — ლუკაშენკო
• ლუკაშენკომ გადააყენა გროდნენსკის გუბერნატორი, სადაც ყველაზე მასშტაბური საპროტესტო აქციები იმართებოდა
• ბელარუსიიდან რადიო თავისუფლების რუსული ბიუროს ჟურნალისტები გამოაძევეს
• ბელარუსში ათეულობით ვებგვერდზე, მათ შორის მედიასაშუალებებზე წვდომა შეზღუდეს და დაბლოკეს

რა ხდება ბელარუსში

ბელარუსში მასობრივი საპროტესტო აქციები 9 აგვისტოდან მიმდინარეობს, რისი მიზეზიც საპრეზიდენტო არჩევნების შედეგები გახდა. არჩევნებზე მთავარი კონკურენტები სვეტლანა ტიხანოვსკაია და მოქმედი პრეზიდენტი ალექსანდრ ლუკაშენკო იყვნენ.

• 26 წელი პრეზიდენტად — ვინ არის ლუკაშენკო და რა ხდება ბელარუსში

ცენტრალური საარჩევნო კომისიის თანახმად, ლუკაშენკომ ხმების 80% აიღო, ტიხანოვსკაიამ — 10%.

შედეგებს მოსახლეობის დიდი ნაწილი და ოპოზიცია არ აღიარებს და ლუკაშენკოს გაყალბებაში ადანაშაულებს. არჩევნების შედეგები არ აღიარა აშშ-მ, ირლანდიამ, კანადამ და ევროკავშირმა. ამავდროულად, ევროკავშირმა ლუკაშენკოს რეჟიმს სანქციები დაუწესა.

პრეზიდენტის არჩევასთან დაკავშირებული პროცედურის გამო გადადგა ბელარუსის მთავრობა, სამოქალაქო საზოგადოება კი "დიქტატორის" გადადგომას ითხოვს, თუმცა ლუკაშენკო მოქალაქეებს სპეცრაზმითა და ჯარის ძალით პასუხობს.

• ვერ ეღირსებით, რომ ზეწოლის ქვეშ რამე გავაკეთო — ლუკაშენკო ხელახალ არჩევნებს არ აპირებს

აქციებზე ცრემლსადენი გაზით, ხელკეტებით, წყლის ჭავლითა და რეზინის ტყვიებით დაშავდა ათასობით ადამიანი, დააკავეს შვიდი ათასზე მეტი. ბელარუსის ჯანდაცვის სამინისტროს ინფორმაციით, აქციებზე გარდაიცვალა 3 ადამიანი, თუმცა ქვეყნის შინაგან საქმეთა სამინისტრო მხოლოდ ერთის გარდაცვალებას ადასტურებს. გავრცელდა ვიდეოც, სადაც ჩანს, როგორ კლავენ აქციის ერთ-ერთ მონაწილეს.

ქვეყნის დატოვება მოუწია საპრეზიდენტო კანდიდატს, სვეტლანა ტიხანოვსკაიას. თავდაპირველად გავრცელდა ვიდეომიმართვა, რომელშიც მან მომიტინგეებს დანებებისკენ მოუწოდა. არსებობს ვარაუდი, რომ ეს ვიდეო დადგმულია და იძულებითაა ჩაწერილი. მეორე ვიდეომიმართვაში კი ტიხანოვსკაიამ განაცხადა, რომ მზად არის გახდეს ეროვნული ლიდერი და ბრძოლა გააგრძელოს.

ევროპული სახელმწიფოების საპირწონედ არჩევნების შედეგები აღიარა რუსეთმა და ოკუპირებულმა აფხაზეთმა. მეტიც, კრემლმა ბელარუსს კოლექტიური სწრაფი რეაგირების ძალების მეშვეობით დახმარება შესთვაზა აქციების დასაშლელად.

• რა ხდება საპროტესტო აქციებზე ბელარუსში