გირჩის ლიდერი, იაგო ხვიჩია არავის სდებს ბრალს ოპოზიციური ერთობის დარღვევაში, რადგან არ თვლის, რომ დეკანოიძის და ვაშაძის "დაპირისპირება" საერთო ოპოზიციური "ამბავია".

"როცა გიორგი ვაშაძე დასახელდა საერთო ოპოზიციურ კანდიდატად, გირჩი მაშინ საერთოდ არ მონაწილეობდა მოლაპარაკებებში. გიორგი ვაშაძე იმ დროს იყო ძალა ერთობაშიას ერთ-ერთი ლიდერი, რომლის მეორე ლიდერი იყო მიხეილ სააკაშვილი. ეს იყო ჩვეულებრივი მათი პარტიული ამბავი, სადაც მათ დაასახელეს კანდიდატი, საერთო ოპოზიციური არც კი ყოფილა ეს ამბავი. როცა გიორგი ვაშაძე დასახელდა, ისინი იყვნენ ერთი ხალხი, ამ ერთ ხალხს შორის ახლა მოხდა კონფლიქტი და თვითონ თქვეს რომ ამ კაცს კი არ ვუჭერთ მხარს, არამედ მეორეს, მე როგორ ვთქვა, რომ ეს არის საერთო ოპოზიციური ამბავი?!" — აცხადებს იაგო ხვიჩია On.ge-სთან საუბრის დროს.

მისი თქმით, ამიტომ არავის სდებს ბრალს ოპოზიციური იდეალების ღალატში და ქართული ოცნებისკენ გადასვლაში, ორივეს [დეკანოიძე და ვაშაძე] უყურებს როგორც ოპოზიციონერს.

"არ მომწონს, რომ ეს ამბავი მოხდა, რადგან არსებობდა შეთანხმება, თუმცა ადამიანურად მაინტერესებს რის გამო მოხდა დაპირისპირება", — ამბობს ის.

რაც შეეხება ჩვენს კითხვას, თუ რომელ კანდიდატს დაუჭერს მხარს გირჩი ისანში, თუ ასე დადგა საკითხი, ხვიჩია აცხადებს, რომ გირჩი ზრდასრული და მრავალფეროვანი ადამიანების ერთობაა და ყველა ინდივიდუალურად მიიღებს გადაწყვეტილებას.

ერთიანმა ნაციონალურმა მოძრაობამ ისანში მაჟორიტარობის კანდიდატი დაასახელა. ამ ოლქში ხატია დეკანოიძე იბრძოლებს. აღნიშნულ გადაწყვეტილებას ოპოზიციური პარტიების მხრიდან კრიტიკა მოჰყვა, მათ ნაციონალური მოძრაობა შეთანხმების დარღვევაში დაადანაშაულეს.