სტრატეგია აღმაშენებლის ლიდერმა, გიორგი ვაშაძემ ოფიციალური სტატისტიკა წარმოადგინა, სადაც აღნიშნულია, რომ 2015 წლის შემდეგ დანაშაულის მაჩვენებელი 35 000-დან 64 000-მდე გაიზარდა, ხოლო დანაშაულის გახსნის მაჩვენებელი 60-დან 35 პროცენტამდე შემცირდა. ვაშაძის განცხადებით, დღეს პოლიცია და სამართალდამცავი უწყებები პოლიტიკურ დავალებებს ასრულებენ და შესაბამისად, ისინი უსაფრთხოებას ვერც უზრუნველყოფენ. სტრატეგია აღმაშენებელის ლიდერის თქმით, გაორმაგდა კრიმინალი და განახევრდა დანაშაულებრივი საქმეების გახსნის პროცენტული მაჩვენებელი, რასაც დღეს არსებული მძიმე სტატისტიკაც ადასტურებს.

"დღეს შიმშილთან ერთად ქვეყანაში ნომერ პირველი პრობლემა კრიმინალია. შედეგად ქვეყანაში დარღვეულია სიმშვიდე და ჩვენი მოქალაქეები უსაფრთხოდ თავს ვეღარ გრძნობენ. წარმოგიდგენთ ოფიციალურ სტატისტიკას, რომელიც დღეს ქვეყანაში არსებულ მძიმე კრიმინოგენულ მდგომარეობას ცხადყოფს. საკმაოდ ბევრი კრიმინოგენული დანაშაულების შემთხვევებია ქვეყანაში: მკვლელობა, ქურდობა, ძარცვა, ყაჩაღობა, ხულიგნობა, ამასთან იმატა დამნაშავის დაუსჯელობის განცდამ", — განაცხადა ვაშაძემ.

ვაშაძე ქვეყანაში შექმნილ მდგომარეობაში "დამსხვრეული ოცნებების პარტიას" ადანაშაულებს და პასუხისმგებლობას აკისრებს. ამასთან, აღნიშნა, რომ დღეს ქვეყანაში მოქალაქეებს ეშინიათ ქუჩაში საღამოს გასვლის, რადგან ოფიციალური მონაცემებით, დანაშაულის კონკრეტული შემთხვევები და დანაშაულის გახსნის პროცენტული მაჩვენებელი მათი უსაფრთხოების გარანტიას ვერ იძლევა.

"დღეს სამართალდამცავი უწყებები გადასულები არიან პოლიტიკური დავალებების შესრულებაზე, რა თქმა უნდა, დრო არ რჩებათ, დაიცვან ჩვენი მოქალაქეები და უზრუნველყოფენ მათი უსაფრთხოება. რადგან "დამსხვრეული ოცნებების პარტიის" მიერ დასახული მთავარი ამოცანა პოლიციური სტრუქტურის დეგრადირებაა და მათივე შეკვეთების შესრულება. მათგან ეკიპაჟებს სტრატეგია აღმაშენებლის ახალგაზრდა მხარდამჭერების დევნის პირდაპირი დავალება და მითითება აქვთ: დააშინონ, ხელი შეუშალონ საიმიჯო პლაკატების გაკვრისას და არა ებრძოლოს ქვეყანაში კატასტროფულად გაზრდილ კრიმინალს. ყველაზე მძიმე რეალობაა, რომ საკმაოდ დაბალია მკვლელობებისა და ყაჩაღობის გახსნის მაჩვენებელი. სერიოზულად მოიმატა თვითმკვლელობების შემთხვევებმა. საქმე აღძრულია ამ მუხლით, თუმცა გამოუძიებელია ამ ადამიანებს ეს თვითმკვლელობა ვინმემ აიძულა, მათზე ფსიქოლოგიური ზეგავლენა ვინ მოახდინა. აი, ეს არის ნომერ პირველი პრობლემა და ამას უნდა ვუპასუხოთ ჩვენ კონკრეტული ქმედებებით", — აღნიშნა გიორგი ვაშაძემ.

მისი თქმით, სტრატეგია აღმაშენებელი წარმოადგენს გეგმას, რომლითაც სამართალდამცავი უწყებები გათავისუფლდებიან იმ წნეხისგან, რომელშიც ისინი მუშაობენ.