NDI-ის კვლევის თანახმად, გამოკითხულთა 48 პროცენტი მიიჩნევს, რომ ქვეყანაში ამჟამად დემოკრატია არის, ხოლო 37 პროცენტი ამ აზრს არ იზიარებს. ამასთან, 14-მა პროცენტმა არ იცის ქვეყანაში არის თუ არა დემოკრატია.

ფოტო: NDI

NDI-ის ახალი კვლევისთვის კვლევის მეთოდი შეიცვალა და პირისპირ ინტერვიუების ნაცვლად, სატელეფონო ინტერვიუები ჩატარდა. ორგანიზაციაში აცხადებენ, რომ ახალი მონაცემების კვლევის წინა ტალღებთან შედარებისას გასათვალისწინებელია ინტერვიუს მეთოდის ცვლილება, რადგან ეს შესაძლოა ცდომილებაზე აისახოს.

საველე სამუშაოები მიმდინარეობდა 6-11 აგვისტოს და 2 045 ინტერვიუ ჩატარდა. კვლევის საშუალო ცდომილების ზღვარია +/- 1,3%.

ორგანიზაციის განცხადებით, რესპონდენტები მარტივი შემთხვევითი შერჩევის გზით — შემთხვევით ნომერზე დარეკვის მეთოდით შეირჩნენ. NDI-ის ინფორმაციით, ინტერვიუები ჩატარდა ქართულ, აზერბაიჯანულ, სომხურ და რუსულ ენებზე. მათივე თქმით, კვლევა საქართველოს მთლიანი მოსახლეობის წარმომადგენლობითია (ოკუპირებული ტერიტორიების გამოკლებით).