სპეციალისტებმა უკვე იპოვეს შავ ზღვაში ჩამოვარდნილი Tu 154-ის ორი შავი ყუთი, რის შემდეგაც რუსულმა მედიამ ავიაკატასტროფის შესაძლო მიზეზებზე დაიწყო საუბარი.

გაზეთი კომერსანტი გამოძიებასთან ახლოს მყოფ პირზე დაყრდნობით წერს, რომ ე.წ. შავი ყუთის მონაცემების გაშიფრვის შედეგად გამოირკვა, რომ აფრენის შემდეგ არ შეიკეცა თვითმფრინავის ფრთის დეტალი - ფლეპერონი. შესაძლოა, სწორედ ეს გამხდარიყო ბორტზე კრიზისული სიტუაციის შექმნის ერთ-ერთი მიზეზი, თუმცა, საბოლოო პასუხი გამოძიებას მას შემდეგ ექნება, რაც სამივე შავი ყუთი გაიშიფრება. სწორედ ეს მოწყობილობები ინახავენ ინფორმაციას ჩამოვარდნამდე თვითმფრინავის ტექნიკური მდგომარეობის შესახებ, ასევე, იწერენ თვითმფრინავში ყველა ხმას.

რუსეთის თავდაცვის სამინისტროს კუთვნილი თვითმფრინავი 25 დეკემბერს, სოჭთან ახლოს, ადლერის აეროპორტიდან აფრენიდან მალევე ჩამოვარდა. ავიაკატასტროფას 92 ადამიანი ემსხვერპლა, მათ შორის იყვნენ ჟურნალისტები, სამხედრო მაღალჩინოსნები და თავდაცვის სამინისტროს მუსიკალური ანსამბლის წევრები. თვითმფრინავი რუსეთიდან სირიაში, ლატაკიას სამხედრო ბაზაზე მიფრინავდა, სადაც ანსამბლს საახალწლო კონცერტი უნდა ჩაეტარებინა.

ამ დროისათვის შავ ზღვაში ნაპოვნია 15 ცხედარი და სხეულის 200-ზე მეტი ფრაგმენტი, რომელთაც გენეტიკური ექსპერტიზა მოსკოვში ჩაუტარდება.