ბრძოლა გაგრძელდება, ქუჩის პროტესტი კვლავ გაგრძელდება. ოპოზიცია გეგმებს არ ცვლის და არ აპირებს შევიდეს პარლამენტში სანამ არ დაკმაყოფილდება მათი მოთხოვნები. ამის შესახებ ნაციონალურ მოძრაობის ერთ-ერთმა ლიდერმა ზაალ უდუმაშვილმა განაცხადა.

"უპირველესყოვლისა მინდა გითხრათ, რომ გრიგოლ ვაშაძემ თავადვე განმარტა გამოქვეყნებული განცხადება. მთავარი ის არის, რომ პროტესტი არ წყდება, ეს არის, როგორც გრიგოლ ვაშაძის, ასევე პარტიის პოზიცია. პარლამენტში შესვლას არავინ არ გეგმავს ვიდრე არ დაკმაყოფილდება ჩვენი მთავარი მოთხოვნა და არ აღდგება ჩვენი ამომრჩევლის ნება. ეს ბრძოლა გაგრძელდება, ქუჩის პროტესტი გაგრძელდება ყველაფერი არის იმ გეგმის მიხედვით რაც ოპოზიციას ჰქონდა დასახული", — განაცხადა უდუმაშვილმა.

დღეს გავრცელდა ენმ-ის თავმჯდომარის, გრიგოლ ვაშაძის განცხადება, სადაც ის პოლიტიკურ პარტიებს მოუწოდებს, პროცესი მშვიდობიან მაგიდასთან გადაიტანონ და ჩაანაცვლონ ქუჩა ყველა დონის საკანონმდებლო ორგანოების ტრიბუნით.

ამ განცხადებიდან მალევე ვაშაძემ დამატებით განმარტებები ფეისბუქზე გაავრცელა და დაწერა, რომ პროტესტი უნდა გაგრძელდეს, მაგრამ დაემატოს პოლიტიკური კომპონენტი. ესენია:

  • მოქალაქეთა პროტესტი უნდა გაგრძელდეს;
  • ამ პროტესტს სასწრაფოდ უნდა დაემატოს პოლიტიკური კომპონენტი — სამართლიანი არჩევნების პრინციპების განხორციელების თაობაზე მოლაპარაკებების სახით სტრატეგიული მოკავშირეების მედიაციით;
  • სანამ/თუ მოლაპარაკებები წარმატებით არ დასრულდება არც მეორე ტურში მონაწილეობას არ ვღებულობთ და არც პარლამენტში არ შევდივართ;
  • ერთხელ და სამუდამოდ ყველა უნდა დავიძაბოთ, რომ მომავალში ქუჩის პროტესტმა ნორმალური პროცესი არ ჩაანაცვლოს არჩევნების გაყალბების გამო".

ოპოზიციის წარმომადგენლები 31 ოქტომბერს ჩატარებული არჩევნების ლეგიტიმაციას არ ცნობენ და საპარლამენტო მანდატებზე უარს ამბობენ. არც ერთი პარტია, რომელმაც 1%-იანი ბარიერი გადალახა, პარლამენტში არ შედის. ისინი პერმანენტულ აქციებს აანონსებენ და მთავრობას ცენტრალური საარჩევნო კომიისიის თავმჯდომარის, თამარ ჟვანიას გადაყენებასა და რიგგარეშე არჩევნების დანიშვნას მოითხოვენ. პარლამენტთან გაიმართა რამდენიმე აქცია, ასევე გაიმართა მსვლელობა ცესკოსკენ, სადაც სპეცრაზმმა წყლის ჭავლის გამოყენებით მომიტინგეები დაშალა.