ქართული ოცნების წევრი, მამუკა მდინარაძეს მიაჩნია, რომ თუ ოპოზიცია ხმების გადათვლაზე უარს ამბობს, ეს ნიშნავს, რომ მათ სიმართლე არ აინტერესებთ. გარდა ამისა, მდინარაძე ამბობს, რომ ხმების გადათვლის შეთავაზება და ცესკოს მიერ ოქმების შეჯამება ერთმანეთთან კავშირში არაა.

"როდესაც ოპოზიცია უარს ამბობს ხმების გადათვლაზე, უარს ამბობს იმ დღის წესრიგში შემოსვლაზე, სადაც მმართველი გუნდის წარმომადგენლები მათ სთავაზობენ ვიდეოკამერების ჩანაწერების ნახვას, რომელიც თითქმის ყველა უბანზე იყოს, გაშიფვრას მის ანალიზს, ხმების გადათვლას და როდესაც ასეთ საკითხებზე უარი გხვდება, კვლავ რადიკალური მოთხოვნები ისმის, ეს იმას ნიშნავს, რომ მათი ინტერესი სიმართლის გარკვევა არ არის", — განაცხადა მდინარაძემ.

როგორც მდინარაძე ამბობს, თუ ოპოზიციის მხრიდან რაციონალური წინადადება იქნება, ისინი განხილვისთვის მზად არიან.

პარლამენტის წინ გამართული აქციის პარალელურად ქართული ოცნების გენერალურმა მდივანმა, კახა კალაძემ განაცხადა, რომ მმართველ პარტიაში ხელახალი არჩევნების ჩატარების საკითხი არც განიხილება. მისივე თქმით, აშშ-ს ელჩთან მოლაპარაკებების დროს ოპოზიციამ უარი თქვა ხმების გადათვლაზე და ვიდეოჩანაწერების შემოწმებაზე, რომელიც ე.წ. კარუსელების შესახებ სპეკულაციებს გააქრობდა. მსგავსი შინაარსის განცხადება მმართველი გუნდის წევრმა, მამუკა მდინარაძემაც გააკეთა.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ.

ამასთან, ოპოზიციის წარმომადგენლების თქმით, ხმების გადათვლას აზრი დაკარგული აქვს, რადგან ცენტრალურ საარჩევნო კომისიაში ოქმები დაჩქარებით შეაჯამეს და გადაწყვეტილება მიიღეს.

მმართველ პარტიასა და ოპოზიციას შორის დიალოგის დაწყების შუამავლები ამჯერადაც ელჩები აღმოჩნდნენ. შეხვედრები აშშ-ს ელჩის, კელი დეგნანის რეზიდენციაში გაიმართა, რომელსაც ევროკავშირის ელჩი, კარლ ჰარცელიც ესწრება.