დღეს, 2 დეკემბერს ცნობილი გახდა, რომ მთავრობა ანტიგენზე დამყარებული სწრაფი ტესტების გამოყენებას აფართოებს და ეს ტესტი ჩაუტარდება ყველას, ვინც სტაციონარში მოხვდება, განურჩევლად იმისა, აქვს თუ არა კორონავირუსის სიმპტომები. პანდემიის დასაწყისში უწყებათაშორისი საკოორდინაციო საბჭოს წევრები ამ ტესტებს სკეპტიკურად უყურებდნენ და აცხადებდნენ, რომ მათი სანდოობა კითხვის ნიშნის ქვეშ დგას და ის PCR ტესტით უნდა გადამოწმდეს, რაც არც დროს ზოგავს და არც რესურს. ქვეყანაში ვირუსის გავრცელების მეათე თვეზე მიდგომა შეიცვალა.

"მოგეხსენებათ, ბოლო თვენახევრის, დაახლოებით ორი თვის განმავლობაში ეს ახალი მიმართულებაა, რომ ახალი გენერაციის ანტიგენზე დამყარებული ტესტები, თუ სწორედ არის გაკეთებული და სწორი ჩვენებით, თითქმის იგივე შედეგს იძლევა, რაც ოქროს სტანდარტი, PCR ტესტი. ამიტომ არის რეკომენდაცია, რომ ისინი მაქსიმალურად იქნეს გამოყენებული", — განაცხადა დაავადებათა კონტროლის ცენტრის დირექტორმა, ამირან გამყრელიძემ.

მისივე განმარტებით, აღნიშნულიდან გამომდინარე, ანტიგენზე დამყარებული ტესტის შედეგის აღიარებისა და გადამოწმების მეთოდი შეიცვალა და ამიერიდან ამ ტესტის პასუხი საბოლოოდ მიიჩნევა, თუ მას ექიმი არ დააყენებს ეჭვქვეშ. კერძოდ, გამყრელიძე განმარტავს, რომ ანტიგენის ტესტი PCR-ზე მხოლოდ ორ შემთხვევაში გადამოწმდება:

"ანტიგენით გამოვლენილი შემთხვევა უკვე აღარ ემოქმედება გადამოწმებას, როგორც ეს გვქონდა გაზაფხულზე და ზაფხულზე. მხოლოდ ორ შემთხვევაში შეიძლება მოხდეს გადამოწმება, ექიმის გადაწყვეტილებით. ამას ხაზს ვუსვამ, ერთი — თუ არის უსიმპტომო ადამიანი, ანტიგენი კი არის დადებითი და ექიმი თვლის, რომ საჭიროა გადამოწმება. მეორე — თუ არის სიმპტომები გამოხატული და ანტიგენი არის უარყოფითი, ისევ ექიმის დანიშნულებით გადამოწმდება.

მაგრამ თუ არის სიმპტომიანი ადამიანი და ანტიგენი დადებითია, მას არავითარი გადამოწმება არ სჭირდება. ის ადამიანი მოქმედებს უკვე იმ პროტოკოლით, როგორც ოქროს სტანდარტით, ანუ PCR-ით დადასტურებულზე".

• გაიგეთ მეტი სწრაფ ტესტებზე

საბჭოში განმარტავენ, რომ გაფართოებული ტესტირების მიზანია არსებული ორთვიანი შეზღუდვებისას მაქსიმალურად ბევრი შემთხვევის გამოვლენა და დროული იზოლირება მოყვეს. ამიტომ, გაფართოებული ტესტირება, შეზღუდვების მსგავსად, პირველ თებერვლამდეა დაგეგმილი.

უწყებათაშორის საკოორდინაციო საბჭოსთან არსებული საოპერაციო შტაბის უფროსის მოადგილემ, ბერდია სიჭინავამ განმარტა, რომ ანტიგენზე დამყარებული ტესტის პასუხი ჩატარებიდან 20 წუთის შემდეგ არის მზად.