ზურაბ ჯაფარიძემ განაცხადა, რომ ის ადამიანები, რომლებსაც გაემიჯნა და განაცხადა, რომ აღარ აპირებდა მათთან ერთად საქმის კეთებას, ვერ შეძლებენ წარმატებული პოლიტიკური ორგანიზაციის შექმნას. ამის შესახებ ჯაფარიძემ მთავარის ეთერში ისაუბრა.

"ბევრი კარგი რამის გაკეთება შეუძლიათ და წარმატებას ვუსურვებ, მაგრამ არ მჯერა, რომ ისინი შეძლებენ წარმატებული პოლიტიკური ორგანიზაციის შექმნას. თუ ვინმე ეძებს დამნაშავეს და ვინ არის პასუხისმგებელი ამაზე, მე ვარ ეს. თუ რაღაც თვალსაზრისით რეპუტაციული ზიანი მომადგა, მაგ თვალსაზრისით მომადგა, რომ ადამიანები ვერ შევარჩიე კარგად იმ მიზნისთვის, რომ პოლიტიკური ორგანიზიმი ააშენონ, რომელიც გაიზრდება, წარმატებას მიაღწევს და როცა შენ აღარ იქნები, გააგრძელებს არსებობას", — განაცხადა ზურაბ ჯაფარიძემ.

4 დეკემბერს ზურაბ ჯაფარიძემ Facebook ჯგუფ გირჩის ბაბლში დაპოსტა, რომ იაგო ხვიჩიასთან, ვახტანგ მეგრელიშვილთან და ალექსანდრე რაქვიაშვილთან ერთად გირჩის კეთებას აღარ აპირებს.

"სამწუხაროდ, ერთი მხრივ ჩემი, ხოლო მეორე მხრივ იაგოს, ვახოს და სანდროს გზები გაიყო. მე არ ვაპირებ მათთან ერთად გირჩის კეთებას. ბევრი მიზეზის გამო, მაგრამ არა იაგოს განცხადების შინაარსის გამო. არც მიზეზებზე ვაპირებ საჯაროდ საუბარს. სამწუხაროდ, ხდება ასეთი რაღაცები ცხოვრებაში.

წარმატებას ვუსურვებ სამივეს. მჯერა, რომ ბევრი კარგი საქმის კეთება შეუძლიათ. ბოდიშს გიხდით ყველას ამის გამო, ზუსტად მესმის, რომ მთელი პასუხისმგებლობა ჩემზეა. გაჩერებას არ ვაპირებ, გირჩის მთავარი ბრძოლები წინაა", — წერს ჯაფარიძე ფეისბუქ ჯგუფში.

როგორც პარტიის თავმჯდომარე, იაგო ხვიჩია ამბობს, ზურა ჯაფარიძესთან მათი უთანხმოება არ უკავშირდება არც პარლამენტში შესვლა-არშესვლის საკითხს და არც პორნოგრაფიის საქმეზე გამოთქმულ მის მოსაზრებას.

რამდენიმე დღის წინ გირჩს ერთ-ერთი ლიდერი, იაგო ხვიჩია იმ ადამიანის დაკავებას გამოეხმაურა, რომელსაც ბრალად ედება წინასწარი შეცნობით არასრულწლოვნის გამოსახულების შემცველი პორნოგრაფიის შეძენა, შენახვა, ფლობა და სარგებლობა. მან Facebook-ზე დაწერა: "პორნო გადმოწერა, დაასეივა, ერთხელაც გადაწყვიტა ესარგებლა და დაიჭირეს? სულ გააფრინეს". სწორედ ამ პოსტს მოჰყვა მოქალაქეების, მათ შორის გირჩის მხარდამჭერების უკმაყოფილება და ხვიჩიას მიმართ კრიტიკა.

პარტიის ლიდერს ამ თემაზე განცხადება რამდენიმე დღის განმავლობაში არ გაუკეთებია. 3 დეკემბერს იაგო ხვიჩიამ განაცხადა, რომ დროა, ზურაბ ჯაფარიძემ ხმა ამოიღოს, რადგან ხვიჩიას მლანძღველების სიაში მისი მეგობრები და დამფინანსებლებიც არიან. ამის შემდეგ ჯაფარიძემ განაცხადა, რომ მისი აზრით, ხვიჩიას განცხადება ბავშვთა პორნოგრაფიის საქმეზე არასწორი იყო, თუმცა არა შინაარსის, არამედ სხვა ფაქტორების გამო. თუმცა მას არ დაუზუსტებია, რას გულისხმობს სხვა ფაქტორებში. მანვე განმარტა, მისი აზრით, რა შემთხვევაში უნდა დაისაჯოს ადამიანი ბავშვთა პორნოგრაფიის ყურებისთვის და ამის რამდენიმე მაგალითი ჩამოთვალა.