ქართული ოცნების აღმასრულებელმა მდივანმა, ირაკლი კობახიძემ განაცხადა, რომ ორგანიზაცია საერთაშორისო გამჭვირვალობა — საქართველოს (TI) ხელმძღვანელთან, ეკა გიგაურთან კომუნიკაცია შედგა და მიიღეს ინფორმაცია, რომ ორგანიზაციას ხმების პარალელური დათvლა არ ჩაუტარებია.

"მივიღეთ ამომწურავი ინფორმაცია ორგანიზაციის საარჩევნო აქტივობებთან დაკავშირებით, მათ შორის, მივიღეთ ინფორმაცია იმის შესახებ, რომ საერთაშორისო გამჭვირვალობას ხმის პარალელური დათვლა, ანუ PVT არ ჩაუტარებია. ორგანიზაცია აკვირდებოდა საარჩევნო პროცედურებსა და ხმის დათვლის პროცესს რამდენიმე ასეულ უბანზე, სადაც წარგზავნილი ჰყავდა საკუთარი დამკვირვებლები. მოხარული ვართ, რომ საერთაშორისო გამჭვირვალობის ხელთ არსებული მონაცემები დაემთხვა ცესკოს შესაბამის მონაცემებს", — განაცხადა ირაკლი კობახიძემ.

ირაკლი კობახიძემ ამის შესახებ სპეციალურად გამართულ ბრიფინგზე ისაუბრა. მანამდე კი, ერთი საათით ადრე გამართული ბრიფინგზე აღნიშნა, ჰქონდათ ინფორმაცია, რომ TI-ს PVT ჩატარებული ჰქონდა, მაგრამ მალავადა, რადგან მისი შედეგები ცესკოს შედეგებს ემთხვეოდა. მისი თქმით, ეს ინფორმაცია ოპოზიციური პარტიის ერთ-ერთმა ლიდერმა ლაშა ნაცვლიშვილს მიაწოდა.

ირაკლი კობახიძის ამ განცხადებას უპასუხა გამჭვირვალობის ხელმძღვანელმა ეკა გიგაურმა და განმარტა, რომ ორგანიზაციას აქვს მონაცემები ოქმებთან დაკავშირებით, რომელიც ატვირთული აქვს და არავითარი PVT მათ არ ჩაუტარებიათ.

"საერთაშორისო გამჭვირვალობა საქართველოს PVT არ ჩაუტარებია, ამიტომ, სანამ მოაწყობდნენ ბრიფინგებს, კარგი იქნებოდა, რომ ეს ინფორმაცია გადაემოწმებინათ. არაფერი გვაქვს დასამალი, ვაკვირდებოდით 500 დამკვირვებლით, აქედან 450 უბანზე გვყავდა სტატიკური დამკვირვებლები, შესაბამისად, ისინი გვაწვდიდნენ ინფორმაციებს, რა ხდებოდა უბნებზე. ასევე, რა თქმა უნდა, გვაქვს ამ 450 უბნიდან მონაცემები ოქმებთან დაკავშირებით და ეს ოქმები ემთხვევა იმ ოქმებს, რომლებიც ატვირთულია ცესკოს საიტზე. ვინც დაინტერესდება ამის შესახებ, ნებისმიერი ინფორმაციის მიწოდება შეგვიძლია", — განაცხადა ეკა გიგაურმა.

მანვე აღნიშნა, რომ ირაკლი კობახიძის ეს გამოსვლა არის თავდასხმა NGEO სექტორზე.