არა, ჰარი პოტერის ახალ წიგნში მოქმედება საქართველოში არ ხდება.

თუმცა, ბევრი ქართველი პოტერჰედის ოცნება, რომ საკულტო საგაში საქართველოც გამოჩენილიყო რაიმე ფორმით, როგორც იქნა, ასრულდა. პოტერიადის სერიაში გამოჩნდა საფრანგეთი, ირლანდია, რუმინეთი, ბულგარეთი და ალბანეთიც კი, თუმცა, როგორც ჩანს, საქართველო ვერც დრაკონების შესასწავლად გამოდგა კარგი ადგილი და ვერც — ვოლდემორის დასამალავად.

მიუხედავად ამისა, ბესტსელერი საგის იტალიური გამოცემის ახალ ყდებზე ნაცნობ ფიგურას ვხვდებით. სერიის დასკვნითი წიგნის, ჰარი პოტერისა და სიკვდილის საჩუქრების ყდაზე ჩანს ხიდი, რომელიც, რაღა დაგიმალოთ, ძალიან ჰგავს ბევრის მიერ მიჩნეულ თბილისის სიმბოლოს — მშვიდობის ხიდს.

ეს ყველაფერი დამთხვევად, ან, უბრალოდ, ყდის დიზაინერის საქართველოთი გატაცებად ჩაითვლებოდა, რომ არა ერთი საინტერესო გარემოება — მშვიდობის ხიდის და სიკვდილის საჩუქრების იტალიური გამოცემის გარეკანის უკან ერთი და იგივე ხელოვანი, მიკელე დე ლუკი დგას.

როგორც იტალიური გამოცემა, Sky იუწყება, ბოლო წლების განმავლობაში ჰარი პოტერის არაერთი გამოცემა დაიბეჭდა, თუმცა ყდის ილუსტრაციებზე ჯადოსნური სამყაროს არქიტექტურაზე ყურადღება არასდროს გამახვილებულა. სწორედ ეს გახდა ამოსავალი წერილი გამომცემლობა Salani-სთვის, ეთანამშრომლა მსოფლიოში აღიარებულ არქიტექტორთან და მის სტუდიასთან, AMDL CIRCLE.

შვიდივე წიგნის ყდაზე თანამედროვე ხედვით გაცოცხლდა როულინგის შექმნილი სამყაროს ზღაპრული არქიტექტურა. ამასთან, დიზაინერის თქმით, წიგნიდან წიგნში ამბის და პერსონაჟების განვითარებასთან ერთად იცვლება ყდის სტილიც.

"წარმოსახვას წარმოსახვა აცოცხლებს", — ამბობს მიკელე დე ლუკი, — "ხედვას აცოცხლებს ხედვა. ჩვენი წარმოსახვა ტრანსფორმაციის პროცესია, როცა ხედვა შეთანხმებულად, თუმცა არა თანამიმდევრულად, იცვლება. ჰარი პოტერის ყდების შექმნისას მე და ჩემმა სტუდიამ ყველაზე მეტად გამორჩეული არქიტექტურული ელემენტები ამოვკრიბეთ, რათა მკითხველის წარმოსახვაში სამყაროს დიდებულება ისეთი სცენარით გაგვეცოცხლებინა, როგორიც აქამდე არ გინახავთ. ფენტეზის ჟანრის თანამედროვე არქიტექტურასთან შერწყმით მივიღეთ შედეგი. ეს შედეგი კი ჰარი პოტერის ჩვენეულ აღქმასა და კოლექტიურ აღქმას შორის გადებული ხიდია".

ჰარი პოტერის საგა გამოცემიდან თითქმის მეოთხედი საუკუნის შემდეგაც კი ყველაზე გაყიდვად წიგნების სერიად რჩება. 2018 წლის მონაცემებით, მსოფლიოში მისი ნახევარ მილიარდზე მეტი ეგზემპლარია გაყიდული და თარგმნილია 87 ენაზე, მათ შორის ორ მკვდარ ენაზე — ლათინურსა და ძველბერძნულზე.