ევროკავშირის ელჩი საქართველოში, კარლ ჰარცელი საქართველოს კონსტიტუციის 100 წლის იუბილეს ულოცავს და აღნიშნავს, რომ ერთი საუკუნის წინ მიღებული დოკუმენტის საფუძვლები საქართველოს ევროპულ ღირებულებებს უსვამს ხაზს.

ჰარცელის თქმით, საქართველოს პირველმა კონსტიტუციამ ქვეყანა ევროპულ ღირებულებათა ფართო ოჯახში მტკიცედ განათავსა. ელჩის განცხადებით, იგი ყველაზე მაღლა აყენებდა დემოკრატიული მმართველობის პრინციპებს, ადამიანის უფლებების პატივისცემას, კანონის უზენაესობისა და ძირითადი თავისუფლებების დაცვას, რაც ასევე შეკრების თავისუფლებას, სიტყვის თავისუფლებასა და ბეჭდურ მედიას მოიცავდა.

"ძალიან მოხარული ვარ, რომ კონსტიტუციის 100 წლის იუბილისადმი მიძღვნილ ღონისძიებაში ვმონაწილეობ. ეს იყო კონსტიტუცია, რომლითაც, როგორც ევროპელი აღფრთოვანებული ვიყავი", — განაცხადა ჰარცელმა.

კონსტიტუციის 100 წლის იუბილესთან დაკავშირებით განცხადება გაავრცელა საქართველოში ევროკავშირის წარმომადგენლობამაც. როგორც მათ მიერ გავრცელებულ განცხადებაში ვკითხულობთ, მრავალი თვალსაზრისით, ეს კონსტიტუცია თავის დროს უსწრებდა.

"მან დანერგა არჩევნების პროპორციული სისტემის პირობებში საყოველთაო საარჩევნო უფლება, რომლითაც ქალები და მამაკაცები თანაბრად სარგებლობდნენ. ამ კონსტიტუციამ გააუქმა სიკვდილით დასჯა და ითვალისწინებდა პოლიტიკური თავშესაფრის უზრუნველყოფას და ეროვნული უმცირესობების დაცვას. მან სოციალურ-ეკონომიკური უფლებები და მართლმსაჯულების აღსრულების მკაცრი ჩარჩოებიც კი განამტკიცა. პროგრესული დემოკრატიისადმი ამ ერთგულებამ თანამედროვე ქართული სახელმწიფოსთვის მნიშვნელოვანი ორიენტირები შექმნა — ორიენტირები, რომლებიც დღემდე მეტად აქტუალურია", — ვკითხულობთ განცხადებაში.

ევროკავშირის წარმომადგენლობაში აღნიშნავენ, რომ საქართველოს ამბიცია ააშენოს წარმატებული, ინკლუზიური, პლურალისტული დემოკრატია ამ ისტორიულ კონსტიტუციაში არის დამკვიდრებული.

"როდესაც ამ დღეს საზეიმოდ ერთად ავღნიშვნავთ, ვიხსენებთ ჩვენს ღრმა პარტნიორობას და კიდევ ერთხელ ვადასტურებთ ევროკავშირის მზადყოფნას, მხარი დაუჭიროს საქართველოს სვლას ძლიერი დემოკრატიისკენ", — წერია განცხადებაში.

100 წლის წინ, 1921 წლის 21 თებერვალს, საქართველოს დამფუძნებელმა კრებამ, საბჭოთა ოკუპაციის საფრთხის ფონზე ქვეყნის პირველი კონსტიტუცია მიიღო.

გაიგეთ მეტი:

• ყველაფერი საქართველოს პირველი დემოკრატიული რესპუბლიკის შესახებ - მარტივად
• როგორ ცხოვრობდა პირველი დამოუკიდებელი რესპუბლიკა