მთავარი პროკურატურა აცხადებს, რომ დეკანოზ გიორგი მამალაძის ბრალდების სისხლის სამართლის საქმესთან დაკავშირებით, მედიაში გავრცელებული ინფორმაცია პროკურატურის განცხადების გარკვეული ინტერპრეტაციაა

ამის შესახებ, პროკურატურა განცხადებას ავრცელებს, სადაც წერია, რომ გამოძიების ინტერესებიდან გამომდინარე საქმის დეტალებზე ინფორმაციას ვერ გაავრცელებენ:

"გამოძიება რამდენიმე ვერსიაზე მუშაობს, რომელთა შესახებ გამოძიების ინტერესებიდან და საქმესთან დაკავშირებულ პირთა უსაფრთხოებიდან გამომდინარე, ამ ეტაპზე კონკრეტულად ვერ ისაუბრებს. ასევე, გამოძიების ინტერესებიდან გამომდინარე, პროკურატურა ამ ეტაპზე ვერც იმას დააკონკრეტებს, თუ ვისი მკვლელობის მომზადება ედება ბრალად ბრალდებულ დეკანოზ გიორგი მამალაძეს.

პროკურატურა საქმის მიმართ არსებულ მაღალ საჯარო ინტერესს აცნობიერებს, თუმცა შესაძლო მსხვერპლთა ვინაობის შესახებ ან ვერსიებზე, რომლებზეც გამოძიება მუშაობს, ხსენებული ინტერესების გათვალისწინებით ამ ეტაპზე ვერ ისაუბრებს. შესაბამისად გთხოვთ იხელმძღვანელოთ პროკურატურის მიერ 13 თებერვალს გაკეთებული ოფიციალური განცხადებებით".

საგამოძიებო ორგანო აცხადებს, რომ მას შემდეგ, რაც დასრულდება სათანადო საგამოძიებო მოქმედებები, გამოძიების მიმდინარეობისა და შედეგების შესახებ, პროკურატურა სრულყოფილ ინფორმაციას გამოაქვეყნებს.

პროკურატურის განცხადებით, ამ ეტაპზე საქმეზე დაკითხულია ათობით მოწმე, ჩატარებულია და მიმდინარეობს საგამოძიებო მოქმედებები. ბრალდებულისგან და მისი საცხოვრებელი სახლიდან ამოღებულია მობილური ტელეფონები, კომპიუტერები და სხვა ნივთები, რომლებზეც დანიშნულია სათანადო ექსპერტიზა.