ფესტივალის ოფიციალურ ფეისბუქ გვერდზე გამოქვეყნებული ინფორმაციის მიხედვით, Tbilisi Open Air არც წელს ჩატარდება. ფესტივალი კორონავირუსის გამო არც შარშან ჩატარებულა.

ფეისბუქგვერდზე გამოქვეყნებული განცხადების მიხედვით, მუსიკალური ფესტივალის გადადების მიზეზი, რომელსაც ათასობით მელომანი ელოდა, დაწესებული და მოსალოდნელი რეგულაციები, ვაქცინაციის ტემპი და ეპიდემიოლოგიური ვითარებაა:

"მთელი ამ დროის განმავლობაში დიდი იმედი გვქონდა, რომ სიტუაცია განიმუხტებოდა და ფესტივალის ჩატარებას წელს მაინც შევძლებდით, თუმცა ამჟამინდელი ეპიდემიოლოგიური ვითარება, სახელმწიფოს მიერ დაწესებული მოქმედი ან მოსალოდნელი რეგულაციები და ვაქცინაციის ტემპი არ გვაძლევს საშუალებას, რომ სრულფასოვნად ჩავატაროთ დიდი მასშტაბის საერთაშორისო ფესტივალი, თუნდაც შემოდგომაზე".

Tbilisi Open Air 2016 წელს

ფოტო: გვანცა ნემსაძე / On.ge

ორგანიზატორები წერენ, რომ ამ პირობებში, მათთვის შეუძლებელია ქართველი მსმენელის უსაფრთხოების უზრუნველყოდა და ასევე უცხოელი შემსრულებლების ჩამოყვანაზე პასუხისმგებლობის აღება.

რაც შეეხება აპრილში დაგეგმილ ორ ღონისძიებას, Lisi Wonderland: Chapter #5 და Lisi Wonderland: Chapter #6, ისინი 17 და 24 აპრილს ვერ გაიმართება და მათ განახლებულ თარიღებს ალტერვიჟენი უახლოეს დღეებში გაავრცელებს.

ყველა, ვისაც 2020 წელს ფესტივალის აბონემენტი ჰქონდა ნაყიდი და არ დააბრუნა, საჩუქრად 10-წლიანი საშვი გადაეცა:

"თქვენ უფასოდ დაესწრებით 2022 წლის ფესტივალს + 10 წელი და 2 წელი, შესაბამისად. ვისაც საშვები ჯერ არ წაუღია, გთხოვთ, მოგვწეროთ ელ. ფოსტის მისამართზე info@altervision.ge ან გამოგვიგზავნოთ პირადი შეტყობინება".

ორგანიზატორები დასძენენ, რომ ოფიციალური ივენთის გარდა, უცნობი პირების მიერ შექმნილია ფესტივალის რამდენიმე ყალბი ფეისბუქივენთი, რომელზეც Tbilisi Open Air პასუხისმგებლობას არ იღებს.