პარტია ლელომ უკრაინის საელჩოსთან სოლიდარობის აქცია გამართა. პარტიის ერთ-ერთი ლიდერის, ლანა გალდავას განცხადებით, საქართველო და უკრაინა საერთო საფრთხეების წინაშე დგანან და საერთო სამომავლო გზა აქვთ.

"ჩვენ გვაქვს საერთო ეგზისტენციალური საფრთხეები, რაც გახლავთ ქვეყნის ოკუპაცია და ანექსია. ყოველდღიურად, ჩვენ ვართ როგორც მცოცავი ოკუპაციის, ასევე ჰიბრიდული საფრთხის ქვეშ და პირდაპირი შეიარაღებული კონფლიქტის პირას. უკრაინაში, ვიცით როგორ განვითარდა მოვლენები — არის, სამწუხაროდ, მსხვერპლიც [...]

საქართველოს და უკრაინას აქვს ერთი გზა. ეს არის ევროკავშირი, ეს არის ევროატლანტიკური მიმართულება, ეს არის ერთად ყოფნა და აუცილებელია, რომ საერთაშორისო დღის წესრიგში კვლავ დაბრუნდეს უკრაინასთან ერთად საქართველოს საქართველოს ოკუპაციის საკითხი, კვლავ შემუშავდეს გეგმები დეოკუპაციის მიმართულებით", — განაცხადა ლანა გალდავამ.

უკრაინის სოლიდარობის აქცია გუშინ, პარტია გირჩი — მეტი თავისუფლებისა და პოლიტიკური მოძრაობა დროას ორგანიზებითაც გაიმართა.

30 მარტს უკრაინის შეიარაღებული ძალების მთავარსარსალმა განაცხადა, რომ რუსეთმა საზღვართან და ოკუპირებულ ტერიტორიებზე ბატალიონების მობილიზება მოახდინა, რამაც ქვეყნის უსაფრთხოებას საფრთხეს უქმნის.

ვითარება შეაფასეს პენტაგონში და რუსეთის ქმედებები დაგმეს. როგორც პენტაგონის პრესსპიკერმა განაცხადა, აშშ ამ საკითხზე NATO-ს მოკავშირეებს ესაუბრება.

სატელეფონო საუბარი შედგა აშშ-ს და უკრაინის თავდაცვის მინისტრებს შორის. ლოიდ ოსტინმა უკრაინელ კოლეგას, ანდრეი ტარანს დაუდასტურა მხარდაჭერა და დაგმო რუსული პროვოკაცია. გარდა ამისა, მან განაცხადა, რომ ესკალაციის შემთხვევაში აშშ უკრაინას არ მიატოვებს.

უკრაინული მედიის ინფორმაციით, 11 აპრილს რუსეთის კონტროლირებადმა ძალებმა დონბასში ცეცხლის შეწყვეტის შეთანხმება ათჯერ დაარღვიეს, რა დროსაც, ერთი უკრაინელი სამხედრო დაიღუპა, ერთი კი დაიჭრა.

მედიის ცნობით, უკრაინული პოზიციების მიმართულებით ნაღმმტყორცნი და ტანკსაწინააღმდეგო ყუმბარმტყორცნები გამოიყენეს, რაც მინსკის შეთახმების თანახმად აკრძალული იყო. უკრაინული მედიის ინფორმაციით, უკრაინელმა ჯარისკაცებმა მათ საპასუხო ცეცხლი გაუხსნეს.

გარდა ამისა, შვედმა დიპლომატმა, კარლ ბილდტიმ გაავრცელა ვიდეო, სადაც ჩანს, რომ რუსეთი უკრაინისკენ სამხედრო ძალების გადაადგილებას აგრძელებს. ამის შესახებ მან საკუთარ ტვიტერზე დაწერა.