ყოფილი პრემიერმინისტრის, გიორგი გახარიას განცხადებით, ჟურნალისტი ცდებოდა "თუ ფიქრობდა", რომ რადგან პოლიტიკური პოზიციონირება შეიცვალა, 20 ივნისთან მიმართებაშიც შეიცვლიდა პოზიციას.

"თქვენ თუ ფიქრობდით, თამარ, იმიტომ, რომ მე პოლიტიკური პოზიციონირება შევიცვალე, 20 ივნისთან მიმართებაში პოზიციას შევიცვლიდი ან ამას პოლიტიკური მიზნებისთვის გამოვიყენებდი, ძალიან ცდებოდით", — უთხრა გახარიამ მთავარი არხის ჟურნალისტს.

დღეს, 31 მაისს გახარია ჟურნალისტების კითხვებს საჯაროდ პასუხობს. მან 29 მაისს პარტიისა და გუნდის პრეზენტაცია გამართა. პარტიას საქართველოსთვის ჰქვია. 18 თებერვალს ის პრემიერმინისტრობის თანამდებობიდან გადადგა. ამის შესახებ მან სპეციალურ ბრიფინგზე განაცხადა და ეს გადაწყვეტილება ნიკა მელიას საქმეს დაუკავშირა. მან ახსენა ისიც, რომ გუნდში ამაზე აზრთა სხვადასხვაობა იყო.

22 მარტს გახარია საზოგადოებასთან თანამდებობის დატოვების შემდეგ პირველად გამოჩნდა და თქვა, რომ "არსად წასვლას არ აპირებს, მეტიც, არც პოლიტიკიდან" მიდის. 14 აპრილს კი გახარიას გუნდის ახალმა წევრმა, გიორგი ხოჯევანიშილმა განაცხადა, რომ ისინი მომდევნო არჩევნებისთვის მზადებას დაიწყებენ და შესაბამისად, მონაწილეობასაც მიიღებენ.

ამ ეტაპზე გახარიას გუნდში ქართული ოცნების 6 ყოფილი დეპუტატია. მმართველი პარტიიდან წავიდნენ და ყოფილ პრემიერმინისტრს უერთდებიან: გიორგი ხოჯევანიშვილი, მიხეილ დაუშვილი, ანა ბუჩუკური, ალექსანდრე მოწერელია, ბექა ლილუაშვილი და შალვა კერესელიძე.

გარდა ამისა, გახარიას პოლიტიკურ პარტიას უერთდებიან NATO-ში საქართველოს ყოფილი ელჩი, ლევან დოლიძე და ყოფილი პრეზიდენტის, გიორგი მარგველაშვილის ადმინისტრაციის ხელმძღვანელი, გიორგი აბაშიშვილი.