ლელოს ლიდერი, მამუკა ხაზარაძე ექსპრემიერმინისტრს, გიორგი გახარიას "სიცრუის ტირჟირების ინსტრუმენტს" უწოდებს და მას დებატებში კიდევ ერთხელ იწვევს. ამის შესახებ ხაზარაძე საკუთარ Facebook-ზე წერს.

"გახარია არის სიცრუის ტირაჟირების ინსტრუმენტი, ტყუილის, რომელიც ანგრევს ამ ქვეყანაში იმედს, ამკვიდრებს განცდას რომ ასეთი მდაბიო ხერხით შეიძლება მიაღწიო, მინისტრობას, პრემიერობას, გერქვას პოლიტიკოსი. გიორგი გახარია, დამიჯექი პირდაპირ ეთერში და მოხდება შენი სრული ლუსტრაცია, ტყუილი უნდა დამთავრდეს ამ ქვეყანაში. მოიტყუე — წერილზე, მოიტყუე — ანაკლიაზე, მოიტყუე — ბადრიზე, მოიტყუე თან ბევრი, გელოდები პირდაპირ ეთერში", — წერს ის.

8 ივნისს გიორგი გახარია TV პირველის ეთერში იმყოფებოდა, სადაც მან სხვადასხვა საკითხზე, მათ შორის ანაკლიის პორტზე ისაუბრა. მისი განცხადებები შეეხო იმ წერილსაც, რომელიც ლელოს ერთ-ერთი ლიდერის, ბადრი ჯაფარიძის თქმით, 2018 წლის არჩევნების წინ გახარიამ პირადად გადასცა. ექსპრემიერმა ისაუბრა, ასევე, ხაზარაძის მაგისტრი მოსამართლის თანდასწრებით გამოკითხვის დეტალებზე.

"ხაზარაძე მაგისტრ მოსამართლესთან ადვოკატთან ერთად მივიდა და თქვა, შუამავალი კი იყო, მაგრამ ეს შუამავლი ჩემი ოჯახის წევრი იყო, ახლო ნათესავი, ამიტომ მის წინააღმდეგ ჩვენებას არ მივცემო, მაშინ როდესაც ბადრი ჯაფარიძე ასეთი არ არის სამართლებრივად და იურიდიულად", — თქვა გახარიამ.

გახარიას ამ განცხადების შემდეგ, ჟურნალისტმა მოგვიანებით თქვა, რომ მას ხაზარაძემ პირდაპირ ეთერში მისწერა კითხვით: "რა იცის გახარიამ მაგისტრ მოსამართლესთან ჩვენების შინაარსში?". აღნიშნულზე გახარიამ უპასუხა, რომ იმ დეტალებზე საუბრობდა, რასაც ჩვენებიდან გამოსვლის შემდეგ ხაზარაძე თავად ჰყვებოდა.

"თვითონ გამოვიდა, მისცა ინტერვიუ და თქვა ყველაფერი, მე შინაარს არ ვყვები, რომ გამოვიდა, მოყვა ის ჩვენება, რაც თქვა, იქ იყო კომენტარები და იქიდან ვიცი", — განაცხადა გახარიამ.

გიორგი გახარიასგან სავარაუდოდ მუქარის წერილის მიღების შესახებ თიბისი ბანკის დამფუძნებელმა, მამუკა ხაზარაძემ გასული წლის 4 მარტს პარლამენტში გამოსვლის დროს ისაუბრა. წერილთან დაკავშირებით პროკურატურამ მამუკა ხაზარაძე სასამართლოში გამოკითხა.

პროკურატურის განცხადებით, დაქტილოსკოპიური ექსპერტიზის შედეგებით დადგინდა, რომ ბადრი ჯაფარიძისა და მამუკა ხაზარაძისთვის გაგზავნილ მუქარის წერილის დედანზე გიორგი გახარიას თითის ანაბეჭდები არ აღმოჩნდა. უწყების ცნობით, წერილის დედანზე ექსპერტიზა სამხარაულის სასამართლო ექსპერტიზის ეროვნულმა ბიურომ ჩაატარა. ექსპერტიზისთვის წერილის გადაცემამდე კი, მამუკა ხაზარაძემ წერილის დედანი საკვლევად ბრიტანულ კერძო კომპანიას გადაუგზავნა.

პროკურატურის ინფორმაციით, ბრიტანული კომპანიისა და სამხარაულის ექსპერტიზის ბიუროს დასკვნები ერთმანეთს ემთხვევა.

ამავე თემაზე: