"საქართველო ვერ გაანადგურა საუკუნეების განმავლობაში ბევრმა აღა მაჰმად ხანმა და თემურ ლენგმა, ვერ იზამს ამას ვერც ივანიშვილი,"- ეს განცხადება რუსთავი 2-ის გენერალურმა დირექტორმა ნიკა გვარამიამ უზენაესი სასამართლოს შენობასთან გააკეთა, სადაც სასამართლოს დიდი პალატა რუსთავი 2-ის საქმეს განიხილავს. გვარამიას თქმით, უზენაესი სასამართლოს შენობაში დღეს საქართველოს ბედი წყდება:

"ბიძინა ივანიშვილები, რამდენი ფულიც არ უნდა ჰქონდეთ მათთვის მოთხრილი ხეებით მიდიან და მოდიან, საქართველო რჩება. საქართველო ვერ გაანადგურა საუკუნეების განმავლობაში ბევრმა აღა მაჰმად ხანმა და თემურ ლენგმა, ვერ იზამს ამას ვერც ივანიშვილი. ქვეყანას ვერ მოთხრი და ვერსად ვერ გადარგავ. თუ 9 მოსამართლეს სურს შეასრულოს ბარების და ნიჩბების როლი, რომლითაც ივანიშვილი მისი ხელისუფლებაში მოსვლიდან თხრის საქართველოს, ეს იქნება მათი არჩევანი, მაგრამ მათი არჩევანი ძალიან მალე გახდება მათი განაჩენი."

გვარამიამ, ასევე, მიმართა ქიბარ ხალვაშს და ის იუდას შეადარა:

"დღეს საქართველოს ხელისუფლებამ საქართველოში ჩამოათრია ქიბარ ხალვაში, ის აქ იმყოფება და ელოდება მის სასარგებლო გადაწყვეტილებას. მე მინდა მას ვუთხრა - ყველა დროის იუდას, არცერთ შემთხვევაში ქიბარ ხალვაშო, შენ საქართველოს, თავისუფალ სიტყვას, მის ევროინტეგრაციულ გზას, ივანიშვილის მონავ, არავინ გაგაჩერებინებს არც ერთ შემთხევაში."

გვარამიამ აღნიშნა, რომ რუსთავი ორს "ისტორიული მისია აქვს" და მედია არც ერთი რეჟიმის დროს არ ყოფილა ასეთი პოლარიზებული:

"რუსთავი 2 დღემდე მოიტანა ყველა საქართველოს მოქალაქემ, რომელიც თვლის, რომ საქართველოში უნდა იყოს პოლიფონია, როგორც ქართულ ხალხურ სიმღერაში, უნდა ისმოდეს სხვადასხვანაირი ხმა. ერთსახოვნება არის დამღუპველი და ამისკენ მიჰყავს ივანიშვილს ქვეყანა."