საქართველოს იუსტიციის მინისტრის, თეა წულუკიანის თქმით, რუსთავი 2-ის საქმეზე გადაწყვეტილება სტრასბურგის სასამართლოს მორიგე მოსამართლემ ერთპიროვნულად მიიღო.

საქართველოს მთავრობამ სტრასბურგის ადამიანის უფლებათა სასამართლოსგან წერილი მიიღო, რომელის მიხედვითაც რუსთავი 2-ის მოპასუხე მხარე მთავრობაა. ამის შესახებ საქართველოს იუსტიციის მინისტრმა თეა წულუკიანმა ამ წუთებში ბრიფინგზე განაცხადა.

წულუკიანმა დასძინა, რომ ბრიფინგის გამართვის მიზეზი საზოგადოებაში არსებული მაღალი ინტერესია.

წულუკიანის ინფორმაციით, რუსთავი 2 სტრასბურგის სასამართლოს სამი მოთხოვნით მიმართა, მათ შორის ერთ-ერთი მოთხოვნა სტრასბურგის სასმართლოში ტელევიზიის საჩივრის განხილვამდე არ მომხდარიყო ტელეკომპანიის წილების ცვლილება.

წულუკიანის თქმით, რუსთავი 2-მა სტრასბურგის სასამართლოსგან მოითხოვა:

1. საქართველოს სახელმწიფოს აეკრძალოს საქართველოს უზენაესი სასამართლოს მიერ 2 მარტს მიღებული გადაწყვეტილების აღსრულება, მანამ, სანამ სტრასბურგის სასამართლო საქმეს არ განიხილავს არსებითად;
2. აეკრძალოს საქართველოს ხელისუფლებას დახუროს ან გააადვილოს რუსთავი 2-ის დახურვა;
3. საქართველოს ხელისუფლებას აეკრძალოს არ შეცვალოს მენეჯმენტი ან ბორდი ამ კომპანიაში;

"რუსთავი 2-მა ამ სამი მოთხოვნის დასასაბუთებლად წარადგინა სხვადასხვა განცხადებები, მათ შორის, სხვადასხვა დროს გაკეთებული სტრასბურგის, ევროსაბჭოს საპარლამენტო ასამბლეის, EPP-ს წევრების, ამერიკის საელჩოს განცხადება, ჩვენს შიგნით მედიაში გაკეთებული სხვადსხვა განცხადებები და თქვა, რომ თუ სტრასბურგის სასამართლო სარჩელის უზრუნველყოფის მის მიერ მოთხოვნილ ღონისძიებას არ გამოიყენებდა საქართველოში დასრულდებოდა დემოკრატია და თბილისის ქუჩებში ატყდებოდა ძალადობა და ქაოსი ბევრ სხვა ნეგატიურ მოვლენასთან ერთად," - აღნიშნა წულუკიანმა, რომლის თქმითაც, მორიგე მოსამართლემ გადაწყვეტილება ისე მიიღო, რომ საქართველოს ინფორმაცია არ მიაწოდა და არც ქვეყნიდან გამოითხოვა.

წულუკიანის თქმით, გადაწყვეტილება მორიგე მოსამართლემ ერთპიროვნულად მიიღო.

"ჩვენთვის უცნობია ვინ იყო ეს მოსამართლე" - დასძინა მან.

წულუკიანმა ასეევ თქვა, რომ ამ მოსამართლემ რუსთავი 2–ის საქმეს მიანიჭა პრიორიტეტი, რაც იმას ნიშნავს, რომ მას სხვა საქმეებზე ადრე განიხილავს. საქართველოს თავდაცვის ყოფილმა მინისტრმა, თინა ხიდაშელმა გადაცემა რეალურ სივრცეში წულუკიანის განცხადებას უხერხული უწოდა. ხიდაშელის თქმით, წულუკიანმა უნდა იცოდეს:

"მორიგე მოსამართლე ჰქვია ამ მოსამართლეს, ასე წერია ამ ტექსტში და შუაღამე რომ მიიღებს სტრასბურგის მოსამართლე რომელიმე სასწრაფო საქმეზე გადაწყვეტილებას, იქ დიდი პალატა არ იკრიბება, ასეთი საქმეებისთვის არსებობს მორიგე მოსამართლე. ეს არის ჩვეულებრივი პროცედურა, ვინმე შეცდომაში რომ არ შევიდეს, თითქოს ერთმა მოსამართლემ ერთპიროვნულად გამოიტანა გადაწყვეტილება".

იუსტიციის მინისტრმა განმარტების გაკეთების შემდეგ, ბრიფინგი დატოვა და ჟურნალისტების კითხვებს არ უპასუხა.

რუსთავი 2-ის საქმესთან დაკავშირებით უზენაესი სასამართლოს დიდი პალატის მიერ გამოტანილი გადაწყვეტილების მეორე დღესვე, სტრასბურგის ადამიანის უფლებათა სასამართლომ ამ გადაწყვეტილების აღსრულება შეაჩერა.

ნახეთ, რა წერია სტრასბურგის სასამართლოს გადაწყვეტილებაში.