როგორც იქნა, გრძელი დღე დამთავრდა, საწოლში მოკალათდით და წიგნის საკითხავადაც მოიცალეთ. დეტექტივს შლით და ფიქრობთ, რომ ალბათ მთელ ღამეს გაგათენებინებთ, მაგრამ რამდენიმე წუთში ქუთუთოებზე ლოდი გეკიდებათ და თვალებით ასოებს კი არა, სანათის გამომრთველს ვეღარ აგნებთ.

ნაცნობი სიტუაციაა, არა?

ყოველ შემთხვევაში, კითხვის მოყვარულებისთვის, რომლებსაც საწოლში მოკალათება უყვართ, მესამე გვერდზევე ფშვინვის დაწყება და წიგნის გვერდისჩაუნიშნავად ხელიდან გადაგდება ნამდვილად ნაცნობი ამბავია. როგორც ამას კვლევები მოწმობს, მიზეზი ყოველთვის დაღლილობა არაა.

BBC-ის Science Focus ხსნის, რომ საძინებლის სიმყუდროვე და ლოგინში მოკალათება ამ სიტუაციაში თქვენ წინააღმდეგ მოქმედებს. მკითხველები, როგორც წესი, წყნარ და კომფორტულ ადგილებს ეძებენ, თუმცა, ზუსტად ასეთი პირობებია იდეალური ძილისთვისაც, ამიტომ, რა გასაკვირია, რომ მოხერხებული საწოლი გთენთავთ და ძილისთვის გამზადებთ.

ამასთან, კითხვა ყურადღების იმ რაღაცებიდან გადატანაშიც გეხმარებათ, რომელიც ალბათ არ დაგაძინებდათ.

"ბევრი ადამიანისათვის კითხვა განტვირთვისა და გართობის საშუალებაა", — ამბობს ნეირომეცნიერი და ექიმი რამან მალჰოტრა, — "ეს კი თქვენს გონებასა და სხეულს ძილისთვის განაწყობს. მთავარი მიზეზი, რის გამოც კითხვა ჩაძინებაში გვეხმარება, ისაა, რომ ეს პროცესი გონებას ცოტა ხნით მოსვენების საშუალებას აძლევს, სანამ შუქებს გამორთავდეთ და დასაძინებლად წახვიდოდეთ".

გარდა ამისა, თითოეული სიტყვის გააზრებაც გონების დაძაბვას მოითხოვს, რაც პროცესს ასევე მომქანცველს ხდის; განსაკუთრებით, მაშინ, როცა საკითხავად მსუბუქი ტექსტი არ შეგირჩევიათ. ამასთან, წინადადებებისთვის ერთიმეორის მიყოლებით თვალის დევნება მოსვენებისკენ გვიბიძგებს.

ამდენად, თუკი სწრაფად ჩაძინების საშუალებებს ეძებთ, კითხვა ამისთვის ერთ-ერთი საუკეთესო გზა ნამდვილად არის. თუმცა, თუ კითხვისას მოძალებული დაქანცულობა კარგი წიგნით თავშექცევაში ყოველთვის ხელს გიშლით, ამასთან გასამკლავებლად რამდენიმე ხერხი არსებობს.

შეგიძლიათ, იკითხოთ დილით ან დღის ისეთ მონაკვეთში, როცა მეტ-ნაკლებად დასვენებული ხართ. ამასთან, რეკომენდებულია აუდიოწიგნების გამოყენებაც. კიდევ ერთი რჩევაა, რომ საკითხავი კუთხე საწოლთან ახლოს არ მოიწყოთ; მეტიც, უმჯობესია, ისეთ ადგილას კითხულობდეთ, სადაც მხოლოდ დაჯდომას შეძლებთ და არა — წამოწოლას. წიგნი ნაკლებად მოგთენთავთ საზოგადოებრივი თავშეყრის ადგილებშიც: კაფეში ან თუნდაც პარკში.