ლელო არჩევნების შემსწავლელი საგამოძიებო კომისიის დადგენილების კენჭისყრაში მონაწილეობას არ მიიღებს. ანა ნაცვლიშვილის თქმით, საგამოძიებო კომისიით ხელისუფლება ცდილობს, გადაფაროს პროკურატურის გამოუძიებელი დარღვევები.

მისივე შეფასებით, საგამოძიებო კომისიის საქმიანობა არასერიოზულია და ამ საკითხზე სასაცილო და სავალალო მდგომარეობაა შექმნილი.

"ერთი მხრივ, ხელისუფლების ხელთ არსებული არცერთი მუდმივმოქმედი საგამოძიებო ინსტრუმენტი გამოყენებული არ არის წინასაარჩევნო პერიოდში ჩადენილ დარღვევებთან, თუ კონკრეტულად კენჭისყრის დღეს ჩადენილ დარღვევებთან დაკავშირებით. არცერთ საქმეზე გამოძიება ბოლომდე არ არის მიყვანილი. ამ პირობებში, ხელისუფლება დაკავებულია ველოსიპედის გამოგონებით და საგამოძიებო კომისიის შექმნით.

ეს [საგამოძიებო კომისია] არის ის ინსტრუმენტი, რომელიც, როგორც წესი, შექმნილია იმისთვის, რომ ოპოზიციამ ანუ პოლიტიკურმა უმცირესობამ, რომლის ხელშიც არ არის სხვა საგამოძიებო ინსტრუმენტები, შეისწავლოს მნიშვნელოვანი საკითხები. აქ გვაქვს ჩვენ ვითარება, როდესაც შსს-მ, პროკურატურამ — იმ უწყებებმა, რომლებსაც ევალებათ მანდატით გამოეძიებინათ ეს ინციდენტები და არაფერი არ გააკეთეს და ახლა ხელისუფლება ცდილობს, საგამოძიებო კომისიით გადაფაროს გამოუძიებელი ინციდენტები", — განაცხადა მან.

ოპოზიციის ჩართულობის გარეშე მოქმედმა არჩევნების შემსწავლელმა დროებითმა საგამოძიებო კომისიამ 2020 წლის საპარლამენტო არჩევნებზე გაყალბება ვერ დაადგინა. გამოქვეყნებული დასკვნა იმეორებს აქამდე არსებულ მოსაზრებას, რომელსაც მმართველი გუნდი აჟღერებდა, რომ გამოვლენილ ხარვეზებს ვერ ექნებოდა არსებითი გავლენა საბოლოო შედეგებზე.

დასკვნაში ხშირად არის გამოყენებული სიტყვები — "უსაფუძვლო" და "არაარგუმენტირებული" — რაც არასამთავრობო ორგანიზაციების კრიტიკულ შეფასებებს მიემართება. ასევე — "სუბიექტური", "პოლიტიკური ინტერესი" და "სპეკულაცია" — რითიც შეფასებულია ოპოზიციური პარტიების მიდგომა საპარლამენტო არჩევნების შედეგებთან დაკავშირებით.

რამდენიმეთვიანი მუშაობის შემდეგ მმართველი გუნდისა და პარლამენტში პრორუსული პარტიის, პატრიოტთა ალიანსის სიით შესული, ამჟამად ევროპელი სოციალისტების, დეპუტატების ჩართულობით მოქმედმა საგამოძიებო კომისიამ დაადგინა, რომ "გამოვლენილი ხარვეზები ძირითადად უკავშირდება პანდემიური და სტრესული გარემოს გავლენით დაშვებულ ტექნიკურ შეცდომებს, რიგ შემთხვევებში საუბნო საარჩევნო კომისიის წევრთა მხრიდან გამოვლენილ გულგრილობას და დაბალ კომპეტენციას".

გაიგეთ მეტი:

• არჩევნების შემსწავლელმა კომისიამ გაყალბება ვერ დაადგინა — რა დაადგინა