სახელმწიფო უსაფრთხოების სამსახურის შენობასთან ინტერვიუს ჩაწერის დროს მოქალაქე, დავით ბაძგარაძემ სიტყვიერი შეურაცხყოფა მიაყენა. ის განსაკუთრებული აგრესიისით ფორმულას ჟურნალისტის მიმართ გამოირჩეოდა, რომელსაც უთხრა, რომ უნდა რცხვენოდეს იმ ტელევიზიაში მუშაობა, რომელიც დავით კეზერაშვილის დაფინანსებულია.

"ბოროტად შესრულებულ ჟურნალისტურ საქმიანობას ვცდილობ რომ ხელი შევუშალო. საქართველოს მოქალაქეების უმრავლესობას თქვენზე გული ერევა", — ამბობს ბაძგარაძე, რომელიც Facebook-ზე ძალადობრივი და ჰომოფობიური ალტ ინფოსა და პრორუსი ლევან ვასაძის პარტიის ერთობა, რაობა,იმედის მხარდამჭერ პოსტებს აზიარებს.

მისივე თქმით, ის თავის გზაზე მიდიოდა, რა დროსაც ჟურნალისტები დაინახა და თავისი უარყოფითი ემოცია გამოხატა.

"გაჩერდა მანქანა გზის მეორე მხარეს, ჩაუწია შუშას. მოგვაყენა სიტყვიერი შეურაცხყოფა. მერე დატრიალდა ზევით და ჩამოვიდა, გააჩერა უსაფრთხოების სამსახურის პარკინგზე. ნახევარი საათის განმავლობაში, თუ მეტი არა, სიტყვიერ შეურაცხყოფას გვაყენებდა", — ამბობს ფორმულას ჟურნალისტი, ნინო ვარძელაშვილი.

ეს პირველი შემთხვევა არ არის, როცა მედიის წარმომადგენლებს სიტყვიერ ან ფიზიკურ შეურაცხყოფას აყენებენ. ფორმულას საინფორმაციო სამსახურის უფროსი, ნანა ინწკირველი მედიის წარმომადგენლების მიმართ აგრესიას ჟურნალისტებზე ხელისუფლების აგრესიულ რიტორიკას უკავშირებს.

"სულ უფრო და უფრო მძიმდება სიტუაცია და რთული ხდება. რაც ყველაზე ცუდია, ასეთ ფაქტებზე რეაგირება არ არის. ბუნებრივია, ხელისუფლებისა და საპატრიარქოს განცხადებები ჟურნალისტების მიმართ აგრესიას ხელს უწყობს", — ამბობს ინწკირველი On.ge-სთან.

ჟურნალისტებს ფიზიკურად გაუსწორდნენ 5-6 ივლისს. ჰომოფობიური და ძალადობრივი ჯგუფების თავდასხმის შედეგად 5 ივლისს 53 ჟურნალისტი დაშავდა. მათგან ერთი TV პირველის ოპერატორი, ლექსო ლაშქარავა 11 ივნისს გარდაიცვალა.

კონტრაქციის მონაწილეები და ორგანიზატორები იყვნენ: საპატრიარქო, მართლმადიდებელ მშობელთა კავშირი, პრორუსული ალტ-ინფო და სხვა ძალადობრივი ჯგუფები. გარდა ამისა, ეკლესიის ორგანიზებით შეკრებაზე მიიყვანეს ბავშვებიც. საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.

აღანიშნავია, რომ ამ დრომდე დაკავებულები არ არიან ძალადობრივი აქციის ორგანიზატორები.

ასევე, 22 ივლისს ვიცე-პრემიერმა და კულტურის მინისტრმა, თეა წულუკიანმა მთავარი არხის ჟურნალისტს მიკროფონი წაართვა და ამ დრომდე არ უბრუნებს. მან ემა გოგოხიას მიკროფონი სენაკის თეატრში წაართვა და შეუარცხყოფა მიაყენა.

გაიგე მეტი: