საქართველოს აშშ-ს კონგრესმენთა დელეგაცია ეწვია. საქართველოს საგარეო საქმეთა სამინისტროს ინფორმაციით, დელეგაციის შემადგენლობაში შედიან კონგრესმენები:

• ალექს ქსავიერ მუნი (დასავლეთ ვირჯინია);
• ბრაიან ჯორჯ სტილი (ვისკონსინი);
• კელი მაიკლ არმსტრონგი (ჩრდ. დაკოტა);
• კეროლ დევინ მილერი (დასავლეთ ვირჯინია);
• რონალდ ჯინ ესტესი (კანზასი).

"აღსანიშნავია, რომ საქართველოში ვიზიტად მყოფი კონგრესმენები აშშ კონგრესის წარმომადგენელთა პალატაში ინიცირებული საქართველოს მხარდამჭერი აქტის თანასპონსორები არიან", — ნათქვამია საგარეო უწყების განცხადებაში.

კონგრესმენებმა საქართველოში ჩამოსვლის შემდეგ კომენტარები გააკეთეს და აღნიშნეს, რომ საქართველოს სრულ მხარდაჭერას უცხადებენ. ალექს მუნი შეშფოთებას გამოთქვამს რუსეთის აგრესიულ ქმედებებზე საქართველოს მიმართ.

"საქართველო არის ამერიკის შეერთებული შტატების მოკავშირე ქვეყანა და ამას ძალიან ვაფასებთ. ჩვენ შეშფოთებულები ვართ რუსეთის აგრესიული ქმედებებით, რომელსაც ის ახორციელებს საქართველოს წინააღმდეგ. გვინდა გამოვხატოთ მხარდაჭერა თქვენი ქვეყნისადმი და მადლობა გადავუხადოთ საქართველოს შესანიშნავი ურთიერთობებისთვის შერთებულ შტატებთან" — განაცხადა ალექს მუნმა. [ფორმულას თარგმანი]

მხარდაჭერას გამოხატავენ საქართველოს მიმართ სხვა კონგრესმენებიც.

"ძალიან მიხარია, რომ ამ ულამაზეს ქვეყანაში ვიმყოფები. შეერთებული შტატებისთვის ძალიან მნიშვნელოვანია, რომ გამოხატოს მხარდაჭერა მსოფლიოს ამ ნაწილში არსებული დემოკრატიული სახელმწიფოს მიმართ. საქართველო დიდიხანია შეერთებული შტატების პარტნიორი ქვეყანაა. მნიშვნელოვანია, რომ დაგიდასტუროთ ჩვენი მხარდაჭერა საქართველოს სუვენერიტეტის მიმართ. მოუთმენლად ველი, რომ საქართველოში შეხვედრებისას ვისაუბრო ორ ქვეყანას შორის არსებულ ურთერთობებზე სხვადასხვა მიმართულებით, მათ შორის ვაჭრობის სფეროში", — აღნიშნა კერონ მილერმა. [ფორმულას თარგმანი]

საგარეო საქმეთა სამინისტროს განცხადებით, 5-წევრიანი დელეგაცია შეხვედრებს გამართავს საქართველოს ხელისუფლების წარმომადგენლებთან, პრემიერმინიტრთან, ვიცე-პრემიერ და საგარეო საქმეთა მინისტრ დავით ზალკალიანთან, თავდაცვის მინისტრთ ჯუანშერ ბურჭულაძესთან და ეკონომიკისა და მდგრადი განვითარების მინისტრ ნათია თურნავასთან. მათივე ცნობით, შეხვედრა საქართველოს პარლამენტშიც გაიმართება. ვიზიტის ფარგლებში კონგრესმენები საოკუპაციო ხაზსაც მოინახულებენ.

საგარეო საქმეთა სამინისტროში, ასევე, აღნიშნავენ, რომ ვიზიტი აშშ-საქართველოს მეგობრობის ასოციაციის მიერ არის ორგანიზებული და 9 სექტემბრამდე გაგრძელდება.