შემოქმედები შთაგონებას არცთუ იშვიათად ბუნების წიაღში დაეძებენ. ზოგიც ამბობს, დედამიწა ყოველთვის ჰყვება ამბავს, ყურს თუ კარგად დაუგდებო. ცხადია, ამას ვერანაირი საბუთით დავამტკიცებთ, თუმცა, შეგიძლიათ, თავად დარწმუნდეთ, თუკი ბუნებაც გიყვართ და კალამიც "გიჭრით".

სტუდენტური ლიტერატურული კონკურსი შემოდგომის ლეგენდა 2021 დაიწყო. ტრადიციულად, კონკურსის ორგანიზატორი წელსაც თბილისის სახელმწიფო უნივერსიტეტია, თუმცა, კონცეფცია — განსხვავებული. "ცხოვრება ტყეში" — ასეთი სახელით გაიმართება ახალგაზრდა მწერლების წლევანდელი შეჯიბრება.

შემოდგომის ლეგენდაში მონაწილეობის მიღება საქართველოში აკრედიტირებული ყველა უმაღლესი სასწავლებლის სამივე საფეხურის (ბაკალავრიატი, მაგისტრატურა, დოქტორანტურა) სტუდენტებს შეუძლიათ. კონკურსი კი, როგორც ყოველთვის, ორ ეტაპად ტარდება.

პირველ ეტაპზე თქვენ ელექტრონული განაცხადის ფორმით უნდა გაგზავნოთ ნებისმიერი ჟანრისა და თემატიკის პროზაული ტექსტი, რომლის მოცულობაც არც ერთ გვერდს ჩამორჩება და არც სამ გვერდს აღემატება. ამის შემდეგ, კონკურსის შიდა ჟიური 10 საუკეთესო მონაწილეს გამოავლენს, რომელიც ფინალურ, იმპროვიზაციულ ტურში გაემგზავრება — წელს პირველად, კურორტ კოხტაზე, სადაც მათ Rooms Hotels უმასპინძლებს.

ფინალური ტურის მერე ჟიური სამ რჩეულს გამოავლენს. მეორე და მესამე ადგილი მფლობელები 700 და 500 ლარს მიიღებენ, შესაბამისად. გამარჯვებული კი 1 000 ლარითა და კონკურსის სიმბოლოთი დაჯილდოვდება.

წელს სიახლე სწორედ იმპროვიზაციული ტურის ადგილმდებარეობაა. შემოდგომის ლეგენდის ფინალისტები, როგორც წესი, კახეთში იყრიდნენ ხოლმე თავს. ეს ტრადიცია კი უკვე ათწლეულზე მეტს ითვლიდა — კონკურსი წელს უკვე მეცამეტედ ტარდება.

აღსანიშნავია, რომ წინა წელი გამონაკლისი იყო. ეპიდსიტუაციის გათვალისწინებითა და რეგულაციების დაცვით, იმპროვიზაციული ტური სამი დღის ნაცვლად, ერთი დღის განმავლობაში გაიმართა თსუ-ის პირველი კორპუსის ეზოში.

2020 წლის შემოდგომის ლეგენდის გამარჯვებული თბილისის სახელმწიფო უნივერსიტეტის სტუდენტი, გოდერძი გორგილაძე, გახდა, მეორე და მესამე ადგილები კი დავით კილაძემ და ანი კილაძემ დაიკავეს.

სტუდენტური ლიტერატურული კონკურსი შემოდგომის ლეგენდა 2009 წლიდან ტარდება. სხვადასხვა წლებში შეჯიბრებაში მონაწილეობა მიიღეს და გაიმარჯვეს ქართულ ლიტერატურულ სივრცეში დღეს უკვე ცნობილმა სახელებმა, მათ შორის — ბექა ადამაშვილმაც, რომელიც 2019 წელს ევროკავშირის ლიტერატურული პრიზით დაჯილდოვდა.