CRRC-ის ახალი კვლევის მიხედვით, გამოკითხულთა 79% ეთანხმება წარმოდგენილ მოსაზრებას, რომ საზოგადოებრივი ტრანსპორტის სწრაფი გადაადგილება უფრო მნიშვნელოვანია, ვიდრე კერძო ავტომობილების, ამიტომ ავტობუსის ზოლები ყველგან უნდა მოეწყოს. ხოლო გამოკითხულთა 11% ეთანხმება მოსაზრებას, რომ ავტომობილების სწრაფი გადაადგილება უფრო მნიშვნელოვანია, ვიდრე საზოგადოებრივი ტრანსპორტის, ამიტომ ავტობუსის ზოლები უნდა არ მოეწყოს.

მკვლევარები რეგრესიულ ანალიზზე დაყრდნობით მიუთითებენ, რომ ადამიანები, რომლებიც არ ფლობენ კერძო ავტომობილს და ასევე, კაცებთან შედარებით ქალები უფრო მეტად უჭერენ მხარს ავტობუსის ზოლების მოწყობას.

ამასთან, კვლევაში რესპონდენტებს ჰკითხეს, რამდენად კამყოფილები არიან საკუთარ საცხოვრებელ სახლთან არსებული სხვადასხვა ინფრასტრუქტურით. შედეგების მიხედვით, გზა გაყვანილობით გამოკითხულთა 78% კმაყოფილია, ხოლო 4% უკმაყოფილო. ელექტრო გაყვანილობით კმაყოფილია 76% და ასევე, 4% უკმაყოფილო. გამოკითხულთა 73% ამბობს, რომ კმაყოფილია განათებით, 6% კი უკმაყოფილოა. სხვა მონაცემები ასე გადანაწილდა:

• საკანალიზაციო სისტემით: კმაყოფილი — 63%; უკმაყოფილო — 12%;
• შენობის სიმყარით: კმაყოფილი — 62%, უკმაყოფილო — 9%;
• სახურავით: კმაყოფილი — 62%; უკმაყოფილო — 8%;
• ეზოთი: კმაყოფილი — 49%; უკმაყოფილო — 16%;
• შენობის იერსახით: კმაყოფილი — 46%; უკმაყოფილო — 19%;
• შესასვლელი/სადარბაზოთი: კმაყოფილი — 43%, უკმაყოფილო — 14%;
• კიბეებით: კმაყოფილი — 41%, უკმაყოფილო — 14%;
• საპარკინგე სივრცით: კმაყოფილი — 35%, უკმაყოფილო — 28%;
• ლიფტით: კმაყოფილი — 26%; უკმაყოფილო — 12%.

კვლევის ავტორები აღნიშნავენ, რომ გამოკითხული კაცები, დაუსაქმებლები, მმართველი პარტიის მხარდამჭერები და სოციალ-ეკონომიკურად შედარებით შეძლებული ადამიანები უფრო მეტად არიან კმაყოფილი საცხოვრებელთან არსებული ინფრასტრუქტურით, ვიდრე ქალები, დასაქმებულები, ოპოზიციის მხარდამჭერები, მიუმხრობელი ამომრჩევლები და სოციალ-ეკონომიკურად ნაკლებად შეძლებული ადამიანები.

CRRC საქართველომ კვლევა 10 აგვისტოდან 5 სექტემბრამდე ჩაატარა. ორგანიზაციის ცნობით, მონაცემთა შეგროვების მეთოდი თბილისის მოსახლეობის წარმომადგენლობითი გამოკითხვა იყო. 2 951 რესპონდენტი გამოიკითხა ე.წ. შემთხვევითი ნომრების გენერირების პრინციპით (Random Digit Dial). ინტერვიუები ჩატარდა ქართულ ენაზე, გამოპასუხება იყო 14,1%, ცდომილების ზღვარია 1,8%.