საქართველოს პარლამენტის თავმჯდომარის პირველი მოადგილის, თამარ ჩუგოშვილის განცხადებით, გაერო-ს ადამიანის უფლებათა საბჭომ საქართველოს საკითხზე მიიღო რეზოლუცია თანამშრომლობა საქართველოსთან, სადაც აღნიშნულია საქართველოს ოკუპირებულ ტერიტორიებზე ადამიანის უფლებების კუთხით მონიტორინგის აუცილებლობა. ამის შესახებ, მან დღეს, 25 მარტს გამართულ ბრიფინგზე ისაუბრა.

ჩუგოშვილის შეფასებით, აღნიშნული რეზოლუცია უმნიშვნელოვანესია, რადგან მასში ხაზგასმულია საქართველოს სუვერენიტეტისა და ტერიტორიული მთლიანობის თემა.

მისივე განმარტებით, გაეროს სპეციალურ მომხსენებელს ადამიანის უფლებების საკითხებში დაევალა შეისწავლოს საქართველოს ოკუპირებულ ტერიტორიებზე ადამიანის უფლებების კუთხით არსებული მდგომარეობა და შესაბამისი ანგარიში გააცნოს ადამიანის უფლებათა საბჭოს მომდევნო სესიებზე:

"ეს ჩვენთვის ძალიან მნიშვნელოვანი ფაქტია იმიტომ, რომ საქართველოს საკითხი ძალიან აქტიურად დგას გაეროს დღის წესრიგში".

პარლამენტის თავმჯდომარის პირველი მოადგილის თქმით, რეზოლუციის მიღება მნიშვნელოვანია იმითაც, რომ მას ძალიან დიდი მხარდაჭერა აღმოაჩნდა და 43 სახელმწიფო გახდა საქართველოს მიერ ინიცირებული ამ რეზოლუციის თანასპონსორი.