პენიტენციური სამსახური ექსპრეზიდენტ მიხეილ სააკაშვილის მდგომარეობის შესახებ გავრცელებულ ინფორმაციას ეხმაურება და ამტკიცებს, რომ მისი მდგომარება სტაბილურია. როგორც უწყებაში ამბობენ, დაწესებულებაში ვივამედის ექიმი მართლა შევიდა, მიზეზი კი სააკაშვილის პირადი ექიმის, ნიკოლოზ ყიფშიძის რეკომენდაცია იყო, რადგან თავად არ არის ამ დარგის სპეციალისტი.

"გავრცელებული ინფორმაცია, თითქოს მე-12 პენიტენციურ დაწესებულებაში ექიმების განსაკუთრებული მობილიზებაა და დაწესებულების მედპერსონალი ბრალდებულ/მსჯავრდებულ მიხეილ სააკაშვილის ჯანმრთელობის მდგომარეობას ვეღარ მართავს, სიმართლეს არ შეესაბამება.

განვმარტავთ, რომ მიხეილ სააკაშვილის ჯანმრთელობის მდგომარეობა სტაბილურია. იგი დაწესებულების მედიკოსების მუდმივი მეთვალყურეობის ქვეშ იმყოფება და მის ჯანმრთელობას საფრთხე არ ემუქრება", — ნათქვამია განცხადებაში.

პენიტენციურის ინფორმაციით, უწყებაში პულმონოლოგის ვიზიტიც არის დაგეგმილი, რომელიც პრევენციულ ხასიათს ატარებს. მათი თქმით, გავრცელებული ინფორმაციით, სააკაშვილის წარსულში გადატანილი აქვს კოვიდინფექცია მძიმე ფორმით.

რუსთავის მე-12 დაწესებულებაში ექიმი ვივამედიდან დღეს, 3 ნოემბერს დილით მივიდა.

მიხეილ სააკაშვილი პენიტენციურ დაწესებულებაში უკვე 34 დღეა შიმშილობს. მან შიმშილობა დაკავების დღიდან გამოაცხადა. მას შემდეგ, რაც ექსპრეზიდენტმა შიმშილობა დაიწყო, ექიმები აღნიშნავენ, რომ მისი ჯანმრთელობის მდგომარეობა სუსტია. მხარდამჭერები და თანაგუნდელები სააკაშვილს შიმშილობის შეწყვეტისკენ მოუწოდებენ.