ცენტრ ემპათიას განცხადებით, მიხეილ სააკაშვილს დამატებითი ინსტრუმენტული და ლაბორატორიული კვლევები ესაჭიროება. ორგანიზაციამ ექსპრეზიდენტ მიხეილ სააკაშვილის ჯანმრთელობის მდგომარეობის შემაჯამებელი დასკვნა გამოაქვეყნა, სადაც წერია, რომ გორის სამხედრო ჰოსპიტალში ჩატარებული მკურნალობა-რეაბილიტაცია ეფექტური არ არის.

"აუცილებელია ნეირო-ფსიქოლოგიური მიმართულების კლინიკაში შესაბამისი მკურნალობა-რეაბილიტაციის კურსის ჩატარება სტაციონარულ პირობებში. ამჟამად გორის სამხედრო ჰოსპიტალში ჩატარებული მკურნალობა-რეაბილიტაცია ვერ შეფასდება ეფექტურად. პაციენტს უნდა მიეცეს შესაძლებლობა მოძიებული იქნას ალტერნატიული სამკურნალო-სარეაბილიტაციო დაწესებულება მისი მდგომარეობის ეფექტური მკურნალობისათვის. არაეფექტური მკურნალობა-რეაბილიტაცია გამოიწვევს მდგომარეობის დამძიმებას, კერძოდ, დიდია კორსაკოვის სინდრომის ჩამოყალიბების რისკი, რაც გამოიწვევს პაციენტის ინვალიდიზაციას", — ვკითხულობთ განცხადებაში.

ემპათიის დასკვნის მიხედვით, 30 ნოემბერს სააკაშვილმა შეწყვიტა თიამინის ტაბლეტიზირებული ფორმით მიღება, რამაც გამოიწვია ცერებრო-ორგანული დისფუნქციით გამოწვეული ფსიქიკური პრობლემები.

"მდგომარეობა დაამძიმა და ურთიერთზემოქმედების ჯაჭვური მექანიზმი წარმოქმნა წამებამ და არაადამიანურმა მოპყრობამ პოსტტრავმული სტრესული დარღვევის განვითარებით. შესაბამისად, აუცილებლად მიგვაჩნია თიამინით მკურნალობის აღდგენა, მოცემულ დასკვნაში წარმოდგენილი დანიშნულებით (500 მგ. დღიური დოზა); ფსიქიატრებისა და ფსიქოლოგების კონსულტაციით, აუცილებელია ინდივიდუალური პაციენტზე ორიენტირებული მკურნალობა-რეაბილიტაციის კურსის განსაზღვრა, გორის სამხედრო ჰოსპიტალში არ არის ამჟამად სიტუაცია ფსიქოთერაპიული ინტერევენციისათვის, ვიდეო თვალთვალისა და შესაძლო მიყურადების ფონზე", — წერია დასკვნაში.

კონსილიუმის განცხადებით, სააკაშვილი საჭიროებს ნევროლოგისა და ნეირო-რეაბილიტოლოგის მეთვალყურეობას. მათი თქმით, აუცილებელია, რეაბილიტაციის პროცესში ჩაერთოს მულტიდისციპლინური გუნდი ფსიქიატრის, ფსიქიოლოგის, ფსიქოთერაპევტის, ენდოკრიონოლოგის, ჰემატოლოგის, გასტრო-ენტეროლოგის და სხვა შესაძლო სპეციალისტების მონაწილეობით.

14 დეკემბერს მიხეილ სააკაშვილის ჯანმრთელობის მდგომარეობის შესახებ დასკვნა გამოაქვეყნა სახალხო დამცველის შექმნილმა კონსილიუმმაც. მათი განცხადებით, სააკაშვილს პოსტტრავმული სტრესული აშლილობა აქვს. ნევროლოგმა თენგო წულაძემ განაცხადა, რომ მდგომარეობა საყურადღებოა და ნევროლოგიური სიმპტომატიკიდან რჩება პათოლოგიები.

გაიგე მეტი:

• დეპრესია და პოსტტრავმული სტრესული აშლილობა — რა წერია ომბუდსმენის ექსპერტთა ჯგუფის დასკვნაში სააკაშვილის ჯანმრთელობის მდგომარეობაზე