უკრაინის პრეზიდენტის ვოლოდიმირ ზელენკის თქმით, მას სურდა ექსპრეზიდენტ მიხეილ სააკაშვილის მკურნალობის პროცესში უკრაინელი ექიმებიც ჩართულიყვნენ, თუმცა ეს, ჯერჯერობით, ვერ ხერხდება. უკრაინულ მედიასთან მან, ასევე, თქვა, რომ მიხეილ სააკაშვილზე მოლაპარაკებებში საქართველოსთან პირადად არის ჩართული და ასევე, აღნიშნა, რომ სააკაშვილთან კომუნიაციაც აქვს.

"მე და მიხეილი... გულწრფელად ვიტყვი, მისგან ვიღებ წერილებს. ის ჩემგან იღებს ინფორმაციას. საქართველოს ხელმძღვანელობას ვესაუბრე ბატონ სააკაშვილთან დაკავშირებით", — განაცხადა ზელენსკიმ ჟურნალისტების კითხვის პასუხად.

უკრაინის პრეზიდენტის თქმით, არის ერთი საკითხი, რაზეც თბილისთან შეთანხმებას ჯერჯერობით ვერ მიაღწია.

"მინდოდა, ჩვენი ექიმები ჩართულიყვნენ პროცესში, ამაზე ჯერჯერობით შეფერხებაა", - განაცხადა მან და დასძინა, რომ ახლა ამ საკითხზე მოლაპარაკებები მიმდინარეობს, რომელშიც მონაწილეობას ევროპის საბჭოს პრეზიდენტი შარლ მიშელიც იღებს. მოლაპარაკების დეტალებზე ზელენკის ჟურნალისტებთან არ უსაუბრია.

უკრაინაში მცხოვრები მიხეილ სააკაშვილი საქართველოში სექტემბრის ბოლოს, საარჩევნოდ დაბრუნდა, რომლის შემდეგაც ის პირველ ოქტომბერს დააკავეს. დაკავების პირველივე დღიდან მან შიმშილობა გამოაცხადა. შიმშილობა გაგრძელდა გლდანის მე-18 დაწესებულებაშიც, სადაც მისი განცხადებით, მოტყუებითა და იძულებით გადაიყვანეს. სააკაშვილმა შიმშილობა მას შემდეგ შეწყვიტა, რაც იუსტიციის სამინისტრომ გორის სამხედრო ჰოსპიტალში გადაყვანა შესთავაზა. ექსპრეზიდენტი რუსთავის პენიტენციური დაწესებულებიდან გორის სამხედრო კლინიკაში 19 ნოემბერს, 50-დღიანი შიმშილობის შემდეგ გადაიყვანეს.