ოპოზიციის მოწვეულ ბათუმის საკრებულოს რიგგარეშე სხდომაზე ქართული ოცნების დეპუტატები არ მივიდნენ. ქვორუმის არარსებობის გამო სხდომა ჩაიშალა. რეგლამენტის მიხედვით, იმისთვის რომ საკრებულოს სხდომა უფლებამოსილი იყოს, მას უნდა ესწრებოდეს წევრთა ნახევარი მაინც, ამ შემთხვევაში — 18 დეპუტატი (ბათუმის საკრებულოში სულ 35 წევრია). საკრებულოს აპარატის იურიდიული სამსახურის უფროსის ინფორმაციით, ოპოზიციის მიერ მოწვეულ სხდომაზე მხოლოდ 15 დეპუტატი დარეგისტრირდა.

მას შემდეგ, რაც საკრებულოს პირველ სხდომაზე თავმჯდომარე ვერ აირჩეს, რიგგარეშე სხდომის მოწვევის უფლება დეპუტატთა სრული შემადგენლობის 1/3-ს, ანუ 12 დეპუტატს ჰქონდა. სწორედ რეგლამენტის ამ ჩანაწერით იხელმძღვანელეს ოპოზიციონერმა დეპუტატებმა და სხდომა მოიწვიოს. როგორც საკრებულოს წვერი პარტია ლელოდან, ირაკლი კუპრაძე განმარტავს, მათ არ ჰქონდათ მოლოდინი, რომ ქართული ოცნება მიწვევას მიიღებდა, თუმცა აცხადებს, რომ სურდათ საზოგადოებისთვის ეჩვენებინათ, "ვინ ქმნის კრიზისს".

"ფაქტობრივი მოცემულობაა, რომ საკრებულო არის შემდგარი, უფლებამოსილება არის ცნობილი. შესაბამისად, ამ უფლებამოსილების ცნობის პროცესში საკრებულოს სხდომები უნდა გაიმართოს. ამაზე ხომ კითხვის ნიშანი არავის არ უჩნდება?! [...] მოვიწვიეთ სხდომა და ველოდით ყველა პარტიის წარმომადგნელობის ყოფნას ამ დარბაზში, თუმცა ქართული ოცნება არ მოვიდა.

მოლოდინი ქართულ ოცნებასთან მიმართებით არაფერზე არ გვაქვს, იმიტომ, რომ მათ არ ახასიათებთ რაციონალური გადაწყვეტილებები, რომლებიც ეყრდნობა ბათუმელების პრობლემატიკის გადაწყვეტას ან, თუნდაც, კრიზისის დასრულებას. კიდევ ერთხელ, ოპოიციამ აჩვენა, რომ ერთადერთი დაინტერესებული მხარეა ამ კრიზისის გადაწყვეტაში", — განაცხადა ირაკლი კურპაძემ.

კუპრაძე ფიქრობს, რომ ოპოზიციამ სხდომები ყოველკვირეულად უნდა მოიწვიოს, მმართველი პარტიის დეპუტატების გამოუცხადებლობა კი საზოგადოებისთვის იქნება სიგნალი, რომ "კრიზისის მთავარი შემოქმედი და მოძალადე არის ქართული ოცნება".

3 დეკემბერს, ბათუმის საკრებულოს ახალარჩეული დეპუტატების პირველ შეკრებაზე, საკრებულოს უფლებამოსილების ცნობის შემდეგ ოპოზიციონერმა დეპუტატებმა დარბაზი დატოვეს. პირველი სხდომაც ქვორუმის არარსებობის გამო ჩაიშალა, რის გამოც ვერ აირჩიეს საკრებულოს თავმჯდომარე.