უკრაინის საზღვრის მიმდებარედ 100 000-ზე მეტი რუსი სამხედროს მობილიზების ცნობების პარალელურად, ჩინეთი ამბობს, რომ აშშ საფრთხეს "აზვიადებს" და დაძაბულობას ქმნის. ამის შესახებ Reuters წერს.

"ზოგიერთი დასავლური ქვეყნის ასეთი უწყვეტი აჟიოტაჟი და დეზინფორმაცია მრავალი გამოწვევის წინაშე მყოფი მსოფლიოსთვის, უწესრიგობასა და გაურკვევლობას შექმნის, ასევე, გაამწვავებს უბედურებასა და განხეთქილებას", — განაცხადა ჩინეთის საგარეო საქმეთა სამინისტროს სპიკერმა და იმედი გამოთქვა, რომ შესაბამისი მხარეები მსგავსი "დეზინფორმაციის" გავრცელებას შეწყვეტენ.

რუსეთის მზარდი აგრესიისა და დასავლეთისგან ზეწოლის ფონზე, ორი ქვეყნის პოზიციები კიდევ უფრო დაახლოვდა. ზამთრის ოლიმპიადის გახსნის ცერემონიამდე, ვლადიმერ პუტინის ვიზიტის ფარგლებში, მოსკოვმა და პეკინმა ერთობლივი განცხადება გამოაქვეყნეს, სადაც მხარეებმა სხვადასხვა საკითხზე საზიარო პოზიციები დააფიქსირეს, მათ შორის, NATO-ს გაფართოებაზე.

"ჩინეთსა და რუსეთს შორის მეგობრობას საზღვრები არ აქვს, არ არსებობს "აკრძალული" სფეროები თანამშრომლობისთვის", — ეწერა განცხადებაში.

რუსეთის მტკიცების პარალელურად, რომ უკრაინის საზღვრის სიახლოვიდან რუსული ჯარები გაჰყავთ, აშშ-ის პრეზიდენტის ადმინისტრაციის ოფიციალური წარმომადგენელი ამბობს, რომ ბოლო დღეებში უკრაინის საზღვართან რუსული ჯარისკაცების რიცხვი 7 000-ით გაიზარდა. უკრაინის პრეზიდენტიც, ვოლოდიმირ ზელენსკიც უარყოფს, რომ რუსეთის ჯარები გადიან. მისი თქმით, ამას რეალურად ვერ ხედავენ და მხოლოდ ესმით მის შესახებ.

ამერიკის შეერთებული შტატების სახელმწიფო მდივნის, ენტონი ბლინკენის განცხადებით, რუსულ სამხედრო ძალებს უკრაინის საზღვარი არ დაუტოვებიათ. მისი თქმით, რუსეთის ქმედებები და განცხადებები ერთმანეთისგან განსხვავდება.

პენტაგონის ინფორმაციით, ბოლო დღეების განმავლობაში, რუსეთის პრეზიდენტმა, ვლადიმერ პუტინმა უკრაინის საზღვართან და ბელარუსის ტერიტორიაზე დამატებითი სამხედრო ძალები განათავსა.

ევროპული საბჭოს პრეზიდენტის, შარლ მიშელის განცხადებით, რუსეთმა ომსა და დიპლომატიას შორის არჩევანი უნდა გააკეთოს. მისი თქმით, უკრაინის წინააღმდეგ რუსეთის უპრეცედენტო სამხედრო ესკალაცია ევროპაში მშვიდობასა და უსაფრთხოებას უქმნის საფრთხეს.