პრემიერმინისტრის, ირაკლი ღარიბაშვილის მტკიცებით, ახლა ექსპრეზიდენტი მიხეილ სააკაშვილი რომ იყოს ხელისუფლებაში, ომი ჯერ თბილისში დაიწყებოდა და შემდეგ კიევში.

"სამწუხაროდ, სამარცხვინოდ უნდა ითქვას, მაშინ, როცა ხალხი იღუპება, აქ მართავენ კონცერტებს და ჟრიამული აქვთ ატეხილი. ეს მაგონებს მე 2008 წლის აგვისტოს ომის დასრულების შემდეგ მაშინ, როცა რუსთაველზე გამოიყვანეს ხალხი და "მიშა, მიშა" აძახებინეს, წაგებული, განადგურებული ქვეყანა გამოაცხადეს გამარჯვებულად. დღესაც, რა თქმა უნდა, ისევ ვიმეორებ, რომ ამ ჩვენი ძალიან ბევრი გულანთებული ქართველის, პატრიოტის კეთილშობილურ გრძნობებზე თამაშობენ და მანიპულირებენ. ყველაფერში საკუთარ ანაგარებასა და ინტერესს ეძებენ, ყველა უბედურებაში.

მე დარწმუნებული ვარ, ძალიან განიცდიან, რომ დღეს აქ ომი არ არის. ვინმეს თუ უფიქრია, დღეს სააკაშვილი რომ იყოს ხელისუფლებაში, დღეს სად ვიქნებოდით? ომი დაიწყებოდა თბილისში ჯერ და შემდეგ კიევში. ეს უნდა ითქვას პირდაპირ მეგობრებო, არ უნდა მოვერიდოთ ამას", — ამბობს ღარიბაშვილი.

25 თებერვალს ღარიბაშვილმა განაცხადა, რომ საქართველო რუსეთს ფინანსურ და ეკონომიკურ სანქციებს არ დაუწესებს. მისი მტიცებით, ეს გადაწყვეტილება ქვეყნის ეროვნულ ინტერესებს ეფუძნება.

ამავე დღეს პრემიერმინისტრმა თქვა, რომ არავითარ საჭიროებას არ ხედავს უკრაინის საკითხზე პარლამენტში რიგგარეშე სხდომის მოწვევის და მას თავისი საქმე აქვს, პარლამენტსაც თავისი საქმე აქვს, ომი კი უკრაინაში მიმდინარეობს.